Pëllumbi: 2018-ta super, buxheti thembra e Akilit
"Rekord ndeshjesh ndërkombëtare, financat të pamjaftueshme"
Viti 2018 ishte shumë intensiv për volejbollin shqiptar, me aktivitete të shumta kombëtare dhe ndërkombëtare. Një rezultat i shkëlqyer erdhi nga Kombëtarja e femrave, e cila fitoi medaljen e bronzit në Ligën e Europës "Silver". Shqipëria priti gjithashtu edhe finalet e Europianit U-19 për vajza. Presidenti i FSHV-së, Erlind Pëllumbi, në një intervistë për "Panorama Sport" bën bilancin e sezonit, duke e konsideruar të suksesshëm, ndërkohë thekson se duhet riparë patjetër buxheti që shkon për volejbollin, pasi është shumë i ulët.
Një bilanc i volejbollit shqiptar për vitin 2018.
Vitin 2018 do ta quaj të super të suksesshëm për vetë faktin e një morie aktivitetesh që ka pasur federata jonë në arenën ndërkombëtare dhe që u mbyll me organizimin e finaleve të Kampionatit Europian U-19, event për të cilin morëm edhe përgëzime nga federata europiane. Patëm një kampionat kombëtar dinjitoz dhe me rivalitet, i cili u kurorëzua me ndeshje spektakolare, si për meshkuj ashtu edhe për femra. Më pas vijuam me ndeshjet e skuadrave kombëtare, ku ekipi i vajzave mori medaljen e bronzit në Ligën e Europës "Silver". Më pas për të vazhduar me skuadrat e tjera të moshave, të cilat përfitoj nga rasti dhe i përgëzoj për punën e bërë.
Si do ta gjykonit pjesën e parë të sezonit 2018-2019?
Faza e parë dhe eliminatoret e Kupës së Shqipërisë treguan sërish një rivalitet të lartë duke qenë vazhdimësi e sezonit të shkuar. Për vetë shpërndarjen e forcave në kampionat kemi pasur takime, të cilat kanë dhuruar spek- takël dhe për këtë fakt ne jemi shumë optimistë për të ardhmen e volejbollit shqiptar.
Klubet shqiptare, për shkak të problemeve të shumta financiare, nuk arrijnë t'i përballojnë shpenzimet që kërkojnë ndeshjet ndërkombëtare. Çfarë mendoni se duhet bërë për ta zgjidhur këtë problem?
Kjo është një çështje e nxehtë dhe tepër delikate, pasi bëhet fjalë për mbijetesën e klubeve. Ne si federatë kemi bërë përpjekje, në mënyrë që të kemi buxhete më të larta, por nuk kemi gjetur mbështetjen në ministri dhe te njerëzit që drejtojnë sportin. Nuk kam parë ndonjë vizion apo dëshirë te këta persona për ta ndryshuar këtë situatë. Megjithatë, duhet të mblidhemi të gjithë bashkë si familje e volejbollit dhe të gjejmë hapësirat dhe mënyrat sesi mund ta zgjidhim këtë çështje. Klubet tona luftojnë për mbijetesë dhe mungon strategjia nga drejtuesit e sportit në ministri, sesi mund të mbështeten këto skuadra. Në volejboll pa ndihmën e shtetit nuk mund të bëhet përpara. Ne kemi për përpjekjet tona në ministri për të qenë sa më afër këtij komuniteti, ku unë jam një nga anëtarët të Këshillit të Lartë të Sportit, e megjithatë nuk kam parë që të mblidhemi apo të kemi një platformë për sa u përket sporteve elitare, të cilat kanë një prioritet në buxhetin e shtetit. Jemi në pritje dhe shpresojmë që sa më parë të bëhet diçka për këtë pjesë, pasi është vërtet një problem serioz. Ne bashkë me klubet po punojmë që t'u krijojmë mundësinë këtyre skuadrave që të marrin pjesë në kompeticione të ndryshme rajonale që të përballemi të paktën me skuadra me kosto më të ulëta, të cilat janë afër nesh.
Në janar rikthehen takimet ndërkombëtare për përfaqësueset e meshkujve dhe femrave. Çfarë prisni nga këto sfida?
Kombëtarja e femrave, siç edhe ju e dini, është një skuadër e rinovuar totalisht dhe mendoj se është shumë shpejt të kërkojmë rezultate. Ndërsa për skuadrën e meshkujve, ne kemi ambicie, pasi jemi në një zonë të "nxehtë" ku mund të kualifikohemi për në finalet e Kampionatit Europian 2019. Kështu që në këtë fundvit, të gjithë ne jemi fokusuar në ekipet kombëtare pasi që në ditët e para të janarit fillojnë ndeshjet, ku ne kemi marrë masat duke nisur grumbullimet përkatëse dhe u krijuar kushtet e përshtatshme ekipeve tona për të bërë një performancë sa më dinjitoze.
Cilat janë objektivat e FSHV-së për vitin 2019?
Përderisa ne e nisim menjëherë vitin me ndeshjet eliminatore të Kampionatit Europian, dëshirojmë që edhe me pak fat të marrim pjesë në Europian me skuadrën e djemve që është edhe më afër kualifikimit. Do të vazhdojmë të punojmë me moshat, ku do të jetë viti i tretë radhazi që ne do t'i aktivizojmë të gjitha ekipet kombëtare të moshave, të paktën në kampionatet ballkanike. Ndërkohë, ajo që dua të theksoj më tepër, objektivi primar i këtij viti është krijimi i një akademie volejbolli për moshat e vogla, duke nisur nga moshat 6 deri në 12 vjeç, në mënyrë që të hedhim filizat e para në volejboll, t'i sensibilizojmë edhe klubet në të gjithë Shqipërinë që të punojnë me moshat, pasi janë e ardhmja. Sigurisht, pa lënë pas dore asnjë nga detyrat që ka federata, siç janë kampionatet kombëtare për të rritur dhe të gjitha moshave të tjera.