Sezoni 2018, rekord fansash në F1
Shefi i marketingut, Shon Breitçis: Vitin tjetër numri i shikuesve do jetë më i lartë
Sezoni 2018 në Formu la 1 u mbyll me garën e fundit të zhvilluar më 25 nëntor në Abu Dabi, ku u dhanë edhe të gjitha verdiktet përfundimtare të sezonit. Ky edicion rezultoi nga më të ndjekurit, duke vendosur edhe rekorde të reja për sa i përket publikut. Mbi katër milionë spektatorë kanë qenë të pranishëm gjithsej në 21 garat që janë zhvilluar gjatë vitit 2018, ku këtu përfshihen të gjitha biletat e shitura zyrtarisht për provat kualifikuese të së shtunës dhe për garat e zhvilluara të dielave. Të gjitha këto të dhëna janë publikuar nga "Liberty Media", e cila është kompania që ka eksluzivitetin e kuotave në Formula 1. Një shifër e jashtëzakonshme shikuesish, e cila mesatarisht shënon rreth 200 mijë spektatorë për çdo garë. Ky numër është një rekord i ri në 10-vjeçarin e fundit në garat e Formula 1. Ky sezon ka pasur mesatarisht 7.83 për qind më shumë ndjekës se ai paraardhës, ndërkohë që gara më e ndjekur rezultoi Çmimi i Madh i Anglisë, ku të pranishëm ishin 340 mijë tifozë. Një detaj interesant është fakti që është regjistruar një numër më i lartë ndjekësish ditën e shtunë gjatë provave kualifikuese sesa të dielave kur zhvilloheshin garat. Të shtunave është regjistruar një numër prej 2.3 milionë shikuesish, ndërsa të dielave të pranishëm kanë qenë 1.7 milionë. Duket se çmimi i biletave ka bërë diferencën, pasi natyrshëm një biletë për garën kushton më tepër. Shefi i marketingut në Formula 1, Shon Breitçis, duket tepër i kënaqur nga këto shifra, të cilat i komentoi kështu: "Jemi shumë të kënaqur nga numri i spektatorëve që kemi pasur në këtë sezon. Duke e krahasuar me sportet e tjera, shikohet qartë që Formula 1 është ndër sportet më të rëndësishme. Besoj që numri i shikuesve do të rritet edhe më shumë gjatë vitit 2019", tha Breitçis.