Flamurtari, kërcënojnë me gjyq edhe dy titullarë
Idrizi zbret në fushë, ka goleadë në miqësore
Flamurtari i madh “shkatërron” të vegjlit. Ekipi i Ilir Dajës ka fituar thellë me rezultatin 8-0 ndeshjen e dytë miqësore të zhvilluar në Vlorë, në kuadër të fazës përgatitore dimërore, ndërsa përballë ka pasur ekipin e 19-vjeçarëve të Flamurtarit. Ndeshja është luajtur në orën 14:00 në fushën sportive në Pyllin e Sodës. Pavarësisht gjashtë mungesave që ka pasur në këtë ndeshje Flamurtari, ato nuk kanë ndikuar aspak të pengonin fitoren e thellë. Veliu, Bushiç, Kale, Alla, Maze dhe Beqaj nuk kanë luajtur në këtë takim, ndërsa kanë kryer stërvitje të diferencuar. Pavarësisht kësaj, trajneri Daja ka hedhur në fushë një formacion titullar me lojtarët kryesorë. Kështu, në portë është aktivizuar Kolici. Në mbrojtje trajneri Daja kishte vendosur Siljanovskin, Deliajn, Pollozhanin dhe Kotobellin. Në mesfushë, Mustafa, Useini, Batha dhe në sulm Torasa, Ribaj dhe Musta.
NDESHJA - Qysh në pjesën e parë Flamurtari ka arritur të shënojë “furinë” e golave. Duket se në këtë ndeshje gola ka pasur për të gjithë. Ka qenë Musta ai që ka shënuar i pari, ndërsa vetëm pak minuta më vonë Riban shënon të dytin. I vjen radha përsëri Mustës që shënon golin e dytë personal dhe të tretin për ekipin, ndërsa do të ishte Batha që do të shënonte më pas edhe golin e katërt në këtë pjesë të parë të takimit miqësor. Në pjesën e dytë nuk ka pasur shumë histori. Batha do të shënonte sërish, ndërsa gola do të vinin edhe nga Useini, e Mustafa. Trajneri Daja do të aktivizonte në këtë ndeshje thuajse të gjithë stolin. Qirko, M. Qarri, J. Qarri, Ymeraj, Licaj, Muçollari, Diamanti, Haruni, Ziaj. Sapo futet në takim, i riu Haruni e justifikon teksa shënon edhe golin e tetë të ndeshjes. Në fund ka
buzëqeshur Flamurtari, ndërsa ekipi U-19 i Flamurtarit nuk ka mundur dot që të shënojë as një gol nderi. Ndeshja është ndjekur nga afër edhe nga administratori Sinan Idrizi, si dhe nga drejtues të tjerë të klubit. Ndërkohë, edhe shumë tifozë
kanë ndjekur nga afër ekipin në këtë takim. Ndërkaq, kjo ishte ndeshja e dytë miqësore, që Flamurtari ka luajtur deri më tani në këtë fazë dimërore që po e zhvillon në Vlorë, ndërsa ndeshja e parë me Lushnjën përfundoi në barazim.