Në Itali bëjnë sondazhe, Kievo synon Hoxhën dhe Bardhin
Mediat pranë klubit veronez shkruajnë për titullarët e Partizanit
Portieri Alban Hoxha dhe fantazisti Jurgen Bardhi po monitorohen nga Kievo Verona. Lajmi ka qarkulluar dje në mediat italiane, duke iu referuar së përditshmes "Il Corriere di Verona", e cila shkruante se titullarët e Partizanit janë në listën e drejtorit sportiv, Xhankarlo Romarone. Ky i fundit mësohet se po ndjek prej kohësh paraqitjen e dy lojtarëve në kampionatin shqiptar, për më tepër që emri i Alban Hoxhës nuk është hera e parë që qarkullon si një mundësi transferimi te Kievo. Edhe tri vite më parë, kur të kuqtë arritën një kualifikim historik në Ligën e Kampioneve kundër Ferencvaroshit dhe në atë takim protagonist absolut ishte portieri, ka pasur bisedime mes palëve, edhe pse akordi nuk u gjet për shumë arsye. Për momentin mediat italiane shkruajnë se bëhet fjalë vetëm për interesim dhe nuk ka diçka konkrete mes klubeve, teksa si Hoxha dhe Bardhi janë nën kontratë me Partizanin. Bardhi është vetëm 21 vjeç dhe e pret një e ardhme e ndritur, teksa transferimi në Itali mund të ishte një hap gjigant për fantazistin e kuq. Drejtuesit e klubit mësohet se për të riun ka pasur vazhdimisht oferta nga klube turke, por asnjëherë nuk është gjetur akordi për shitjen. Gjatë këtij sezoni i riu me origjinë nga Fushë-Kruja po luan rregullisht dhe ka shënuar deri më tani
tre gola. Nga ana tjetër, edhe Hoxha po kalon një moment shumë të mirë, duke qenë portieri që pëson më pak në kampionatin shqiptar. Në karrierën e deritanishme 31-vjeçari nuk ka provuar asnjëherë një aventurë jashtë Shqipërisë dhe do të ishte si qershia mbi tortë nëse realizohej në këtë moment.