Shehi: Na duhen patjetër mesfushorë
Trajneri i Skënderbeut, Orges Shehi, u shfaq i kënaqur pas ndeshjes së djeshme, teksa theksoi për "Panorama Sport" se skuadra ka rritje në lojë. Mirëpo, ai është i shqetësuar për dëmtimet e shumta, ndërsa bëri të ditur se ekipi ka nevojë për përforcime urgjente në mesfushë. "Është e dukshme që kemi rritje çdo ditë që kalon në aspektin e lojës. Në pjesën e parë u aktivizua grupi i lojtarëve që presim të ketë peshën më të madhe të kampionatit dhe në pjesën e dytë krijuam mundësinë për të gjithë lojtarët që kishim të gatshëm. Jam i kënaqur nga të gjithë dhe them që ishte një test shumë i rëndësishëm e pozitiv njëkohësisht. Gjithsesi, kemi ende rrugë përpara dhe duhet akoma më shumë punë nga të gjithë", deklaroi Shehi, i cili komentoi edhe afrimin e Elmir Asanit. "Më vjen mirë që gjeti rrugën e rrjetës që në debutim. Është një lojtar i afruar prej dy ditësh në radhët tona dhe jo më kot i dhashë mundësi nga minuta e parë. Çfarë ne kërkojmë, mendoj se ai i plotëson dhe i ka të gjitha cilësitë e duhura. Në këtë moment kemi shumë mungesa dhe për këtë jemi të vetëdijshëm të gjithë. Ne jemi një skuadër që patjetër po kërkojmë të përforcohemi në mesfushë, sepse momentalisht kemi vetëm tre lojtarë në dispozicion për atë repart. Sa u përket emrave konkretë, nuk di të them pa i parë në fushë dhe nën urdhrat e mi. Kemi disa opsione dhe po punojmë për të bërë goditjen e duhur", sqaroi trajneri, i cili në fund foli edhe për dëmtimet e shumta. "Në këtë fazë po na ndjekin dëmtimet dhe fati keq. Këtë herë e pësoi Lulaj dhe me aq sa pashë, ka një dëmtim serioz. Do të mungojë të paktën për tri javë", përfundoi numri një i pankinës korçare.