Kamza, stërvitje speciale në... plazh
Trajneri Gjoka, “terapi” ekipit
Skuadra e Kamzës është zhvendosur tashmë në Golem, ku do të qëndrojë një javë, ndërsa ndeshjet do t’i zhvillojë 10 kilometra larg resortit, që ndodhet pranë ishsektorit “Rinia” në Durrës. Çdo gjë duket mirë e bukur si dhe vetë lojtarët janë të kënaqur. Gjatë këtyre ditëve, skuadra do të zhvillojë edhe dy miqësore. E para do të jetë këtë të mërkurë në aneksin e stadiumit “Niko Dovana” të Durrësit ku do të presë Kastriotin. Ndërkohë që trajneri Gjoka duket se është i kënaqur me skuadrën e tij dhe se ambientimi është bërë shumë mirë në kohë. Ai është mjaft i bindur për mbijetesën e skuadrës dhe optimist për pjesën e mbetur
të kampionatit, ku skuadra e tij do të funksionojë si një e tërë. “Mendoj se Kamza do të shpëtojë, jemi duke përforcuar skuadrën me lojtarë të tjerë, por ende mbetet për t’u parë forma e dy afrimeve. Ne nuk do të shohim sesi luajnë apo gabojnë rivalet tona, por do të përqendrohemi në punën tonë, duke bërë luftën tonë. Unë mendoj se kush do të gabojë më pak, nga 4 rivalet e kësaj lufte të mbijetesës, Tirana, Luftëtari, ne dhe Kastrioti, do t’i shpëtojë rënies nga kategoria. Skuadra që do të jetë më e fortë nga ana psikologjike dhe kush do gjejë përkrahjen nga presidenca, do ta kalojë provimin. Ne duhet që të kemi përkrahjen dhe mbështetjen e të gjithë hallkave drejtuese të klubit, presidencë–bashki. Nëse kjo do të funksionojë normalisht, Kamza është e sigurt që nuk do të jetë në vallen e skuadrave që kërkojnë mbijetesën”, ka deklaruar Gjoka për “Panorama Sport”, para zhvendosjes në Durrës.