Apolonia nuk di të fitojë, Dinamo e ndëshkon në fund

Fierakët provojnë lojtarët e rinj që kanë luajtur pak

Apolonia ka zhvilluar miqësoren e dytë të këtij viti. Këtë herë fierakët kanë luajtur kundër Dinamos, sërish në Fier. Përtej rezultatit të barabartë 1-1, të dyja skuadrat, por sidomos Apolonia, kanë pasur mundësi të testojnë lojtarët, që pak hapësira kanë pasur gjatë kampionatit apo dhe të tjerë që janë në provë. NDESHJA Pjesa e parë ka qenë pak a shumë e barabartë, me përpjekje më të mëdha nga fierakët, që arrijnë të konkretizojnë në minutën e 12-të. Ka qenë një aksion nga e majta e sulmit dhe Gjata ka pasuar me përpikmëri drejt qendrës, ku K.Mehmeti gjuan brenda zonës dhe mposht portierin Laço. Pas golit, loja është e balancuar dhe të dyja skuadrat përpiqen për t’i marrë epërsinë njëratjetrës, por rastet në portat respektive janë shumë të rralla. Dinamovitët kërkojnë të barazojnë, por Çema, Prendi e Topalli mbulohen mirë nga mbrojtja e Apolonisë, ndërkohë që fierakët kanë mundësinë më të mirë për të dyfishuar në minutën e 42-të, por K.Mehmeti brenda zonës gjuan dobët mbi tra. Në pjesën e dytë ka shumë zëvendësime dhe loja nis me ritëm më të shpejtë. Katër raste të mira shënimi për fierakët në harkun e 5' të para. Hysenshaha dy herë, K. Prifti dhe Hidersha provojnë me gjuajtje nga distanca të ndryshme nga jashtë zonës dhe shënjestrojnë saktë kuadratin, por në të gjitha rastet goli është evituar nga ndërhyrjet e portierit Laço. 10' përpara fundit, K. Prifti asiston mirë tek i riu Alillari, që gjuan fort, por

topi largohet në korner nga portieri kundërshtar. Dy minuta më vonë do të vijë dhe goli i barazimit. Aksion i ndërtuar mirë nga dinamovitët dhe Çeliku gjen të çarë qendrën e mbrojtjes fierake, duke e pasur të lehtë finalizimin. Ndeshja mbyllet në barazim.

Bujar Rama