Hajduk Split e zyrtarizon, Tahiraj: Doja vetëm këtë ekip
Ekipi kroat e mirëpret në shqip, mesfushori vlonjat firmosi deri më 2022
Tashmë gjithçka është zyrtare. Pasi u mendua se do të kalonte te Dinamo e Zagrebit, mesfushori vlonjat, Françesko Tahiraj, i lindur në Itali, është zyrtarizuar te Hajduku i Splitit në Kroaci. U tha që në orët e fundit të mbrëmjes së të premtes se surpriza e madhe ishte transferimi i tij te Hajduku, pavarësisht diskutimeve që ishin bërë për te Dinamo e Zagrebit dhe prezantimi i djeshëm konfirmoi surprizën në Kroaci.
PREZANTIMI - Pas fjalëve dhe tratativave që kishin bërë "lëmsh" Kroacinë, futbollisti shqiptar është paraqitur dje në ambientet e klubit të Hajduk Splitit, ku edhe kaloi vizitat mjekësore. Pas
kësaj procedure, ai firmosi kontratën deri në vitin 2022 me klubin dhe sot do të niset për në Turqi, ku do të bashkohet me shokët e rinj të ekipit për të qenë pjesë e fazës përgatitore.
DEKLARATA - Sigurisht, fjalë pozitive në daljen e tij të parë publike si futbollist i Hajdukut, Tahiraj
shpreh gëzimin që iu plotësua kjo dëshirë në merkato. "Jam i lumtur që më fund u realizua ky transferim. Nga fillimi kisha vetëm një dëshirë: Të vija te Hajduku. Me zor po pres për stërvitjen e parë dhe dua të justifikoj besimin që më është dhënë duke treguar vlerat e mia në këtë skuadër", ishin fjalët e para të Tahirajt si lojtar i Hajdukut. 22vjeçari ka qenë pjesë e ekipeve të moshave U-17 dhe U-19 në Kombëtare, por nuk është thirrur asnjëherë në ekipin e parë A, edhe pse performanca, të paktën sezonin e fundit te Aluminij në Slloveni, ka qenë mjaft e mirë.
KLUBI -
Ai zotëron edhe një nënshtetësi italiane, ndërkohë bie në sy se sajti zyrtar i klubit ia ka ofruar mirëseardhjen në dy gjuhë. "I mirëpritur" dhe "Benvenuto", shkruhet në foton që shoqëron prezantimin e Françeskos, duke i uruar atij mirëseardhjen në gjuhën shqipe dhe atë italiane.