Apolonia bën dopietë, Elbasani dhe Kamza humbin në tavolinë
Djemtë e vajzat fierake thyejnë Partizanin e Flamuratin
Dje u zhvilluan ndeshjet e para paraeliminatore të vlefshme për Kupën e Shqipërisë në basketboll për djem dhe vajza. Nga katër sfida të parashikuara, u luajtën vetëm dy të tilla, pasi Elbasani për meshkuj dhe Kamza për femra nuk udhëtuan drejt qytetit të Korçës për t'u përballur me Skënderbeun vendës. Ky tur paraeliminator konfirmoi edhe një herë tjetër gjendjen e vështirë që kalon sporti i koshit në vendin tonë, me skuadra që nuk munden dot as të përballojnë kostot e një udhëtimi me autobus dhe vendosin të mos paraqiten. Por, le të kthehemi në takimet e zhvilluara, të cilat panë si triumfuese skuadrën e Apolonisë që arriti të sigurojë kalimin për në raundin tjetër në të dyja gjinitë. Për meshkuj skuadra fierake ia doli me sukses në transfertën vlonjate, duke mposhtur Flamurtarin vendës me rezultatin e ngushtë 51-49. Sfida starton me shumë rivalitet nga të dyja skuadrat, të cilat luftojnë fort ku asnjëra nuk arrin të krijojë shkëputje në pikë. Perioda e parë mbyllet në barazim 12-12. Në periodën e dytë, Apolonia është më e qartë në lojë dhe arrin të krijojë një avantazh të lehtë, duke shkuar në pushimin ndërmjet dy pjesëve në shifrat 23-29. Fierakët e administrojnë më së miri këtë epërsi pikësh, edhe pse Flamurtari përpiqet të rikuperojë. Me këtë triumf Apolonia siguron kalimin për më tej ku do të ndeshet me kryeqytetasit e Invaders më datë 16 janar. Në raundin tjetër kalon edhe Skënderbeu që kualifikohet për shkak të mosparaqitjes së Elbasanit. Korçarët tashmë do të sfidojnë skuadrën Eagles. FEMRAT
Apolonia nuk e pati aspak të vështirë të triumfonte ndaj Partizanit. Në takimin e luajtur në Vlorë, vajzat fierake shpartalluan ato kryeqytetase në shifrat 55-30. Apolonia vendos diktatin e saj në parket që në periodën e parë, duke e nisur vrullshëm ndeshjen dhe duke krijuar menjëherë një avantazh të konsiderueshëm në pikë, ku perioda e parë fitohet bindshëm prej tyre 15-4. Në 10minutëshin e dytë loja është disi më e ekuilibruar dhe kryeqytetaset reagojnë duke e fituar këtë fraksion 13-11. Kështu, pjesa e parë mbyllet
26-17 për Apoloninë. Dominimi i fierakeve vijon edhe gjatë pjesës së dytë ku diferenca në pikë thellohet gradualisht edhe më shumë. E gjithë sfida mbyllet 55-30 për skuadrën bardhejeshile që arrin kështu të sigurojë kualifikimin për në çerekfinale, ku do të përballet ndaj SHB Tiranës. Në çerekfinale kalon edhe Skënderbeu, duke e marrë kualifikimin në tavolinë për shkak se Kamza vendosi të mos paraqitej në këtë përballje. Korçaret do të kërkojnë kalimin për në gjysmëfinale ndaj SHKB Tiranës. O.Llambro/Ll.Saro