Tirana dhe Luftëtari “pikiatë”
Kastrioti dhe Kamza kompletojnë formacionin, Kuka në portë dhe Martinena në sulm
Fundi i çdo pjese se zoni shoqërohet gjithnjë me bilance dhe përjashtim nuk mund të bënte as "Panorama Sport" me vlerësimet e saj. Pasi janë luajtur 18 ndeshje referuar rubrikës së përjavshme të gazetës sonë rreth formacionit më të dobët, rezulton se Luftëtari dhe Tirana janë në "pikiatë". Pritshmëritë kanë qenë dukshëm të mëdha për të dyja këto ekipe. E para vinte nga Kategoria e Parë dhe me synime madhore, ndërsa e dyta pas pjesëmarrjes në Kupat e Europës. Si njëra, ashtu edhe tjera kanë zënë 7 pozicione në këto 11-she, por me bluzinjtë me një vend më shumë. Mbrojtjen e kanë "zaptuar" pikërisht këto dy skuadra që deri në këtë fazë luajnë për të shpëtuar dhe kjo është e qartë edhe prej renditjes. Krahu i majtë i mbrojtjes është i Hoxhallarit, ndërsa i djathti i Lejdi Liçajt të larguar tashmë nga Gjirokastra. Përkatësisht kanë dalë nga 5 dhe 4 herë në këtë formacion. Qendra e majtë i takon ganezit Vincent Atinga, ndërsa e djathta Nemanja Janiçiç që kanë nga 5 dhe 3 vota. Sakaq, pjesë e kësaj liste është edhe Lukman Husein me 5 prezenca. Tre të tjerët janë pozicionuar në mesfushë. Për bluzinjtë është Behar Ramadani me 4 dhe Vladan Milosavljev me 3, ndërsa për bardheblutë është Edon Hasani me 5. Që të kompletohet ky repart është edhe Niko Zisi, i cili djathtas nuk ka shkëlqyer dhe kjo kuptohet nga fakti që në 3 javë i është dashur që të përfundojë në formacionin më të dobët. Porta i takon Klajdi Kukës së Kastriotit, i cili 4 herë ka qenë larg pritshmërive, ndërsa maja e sulmit i takon Nestor Martinenës. Edhe pse në kohët e arta te Dinamo ishte një "lider", te kamzalinjtë nuk po gjen dot veten dhe kjo ka bërë që në tri ndeshje të mos duket kurrkund në fushë. Me një vendosje 5-4-1, trajneri më i dobët rezulton Ze Maria. Ka dalë tri herë te më të dobëtit dhe kjo bëri që të largohej me vetëm 8 pikë nga drejtimi i Tiranës, me 4 humbje, 2 fitore dhe 2 barazime.