Zbulohet plani i merkatos, Apolonia i kthehet “dashurisë” serbe
Trajneri Miliç do të sjellë sot dy sulmues nga Serbia
Apolonia ka barazuar 1-1 me Dinamon, një miqësore që u ka shërbyer fierakëve për të marrë vendimin përkatës për të larguar 5 nga 6 lojtarë të testuar gjatë ndeshjes me blutë. I vetmi që do të vazhdojë të vëzhgohet është mbrojtësi kosovar i linjës së majtë, Nderim Jashari, ndërsa të tjerët: Toçuku, Alillari, Bejzade, Ropi, madje edhe Ferro, që ka dalë nga akademia e Apolonisë, nuk kanë marrë “OK”in për vazhdimësi te skuadra fierake. Mbase për kortezi dhe etikë formale sportive duhej pritur që këta lojtarë të larguar të testoheshin edhe nga trajneri Miliç, pasi është personi që ka përgjegjësinë direkte tani e tutje për ecurinë e Apolonisë. Gjithsesi, mbase nuk ishte “shou” mediatik dhe largimi brenda një miqësoreje i plot 5 lojtarëve, sepse nuk dëshmon vetëm anën që klubi pretendon se Apolonia ka kërkesa të larta në merkato (ndërkohë teston vetëm futbollistë të rinj), por duhet parë edhe ana tjetër e medaljes: fierakët nuk bindin dot të bëjnë pjesë të tyre lojtarë cilësorë dhe që krijojnë diferencë; shkaqet mbeten pezull...
- Trajneri Miliç dhe ndihmësi i tij i parë, Careviç, do të marrin drejtimin e skuadrës fierake për të bërë sipas tyre më të mirën e mundshme tek Apolonia. Por ekipi nuk është shumë komod në përbërje, pasi janë larguar shumë futbollistë gjatë kësaj periudhe dimërore dhe nga ana tjetër nuk ka asnjë përforcim të vetëm! Në këtë situatë jo fort të favorshme, Miliç dhe asistenti i tij, ca më tepër trajnerë të rinj dhe pa përvojë me ekipe të para, pritet që të bëjnë edhe rolin e menaxherit, duke projektuar për në Fier lojtarë cilësorë nga Bosnja, Serbia dhe republika të tjera ishjugosllave, futbollistë të kategorive elitare në kampionatet përkatëse, të aftë për të bërë diferencën në Kategorinë e Parë shqiptare. Që nga kjo e hënë pritet që tek Apolonia të dalin në stërvitje dy futbollistë nga Serbia, të cilët luajnë në pjesën ofensive dhe që Miliç pretendon se plotësojnë boshllëqet e skuadrës në këtë repart. Por, nuk do të jenë të fundit, pasi në ditët në vazhdim priten edhe 2-3 lojtarë të tjerë nga vendi fqinj, sugjerim i dy trajnerëve serbë të Apolonisë. Miliç ka vetëm dy ditë në dispozicion për të stërvitur ekipin, pasi të mërkurën do të ketë “premierë” në miqësore me Korabin e Peshkopisë, ndeshje që do të luhet në kompleksin “Internacional”. Si në kohën kur skuadra drejtohej nga serbi Esat Karishik, duket se Apolonia i kthehet sërish “dashurisë” ndaj serbëve.