Sinella: Si po e ndryshojmë Egnatian
Fitorja e arritur në testin e së shtunës me Albpetrolin tregoi edhe njëherë se rrogozhinasit janë në formë. Ndërsa sa u përket të afruarve Vogli,Troka dhe Bakalli, megjithëse ishte sfida e parë me fanellën rrogozhinase bindën. Për “Panorama Sport” pas përfundimit të miqësores, trajneri Bledar Sinella deklaroi: “Ishte një test mjaft i vlefshëm për ne, ky që zhvilluam me Albpetrolin të shtunën, pasi na dha mundësi që të krijojmë ide më të qarta rreth çdo lojtari të çdo reparti. Kemi pothuajse dy javë që kemi nisur përgatitjet dimërore dhe mendoj se jemi në rrugën e duhur. Megjithëse, na duhet ende punë që të përmirësojmë akoma më tepër nëse duam të shikojmë një skuadër konkurruese ndaj kujtdo. Së bashku me stafin menduam që të bëjmë edhe disa lëvizje në formacion për të përshtatur gjithsecilin në pozicionin e duhur”, deklaroi trajneri Sinella.