Paketa, premiera e mirë e "bën" titullar në Arabi
Ditët e para të Lukas Paketas si kuqezi kanë qenë të gjitha të karakterizuara nga lavdërime në të katërta anët. Presidenti Skaroni e cilëson si pjesë të mozaikut që do të ngrejë Milanin në elitë. Drejtori Leonardo i nënvijëzoi cilësitë njerëzore dhe sportive, teksa komenti më pikant ishte ai i shokut të skuadrës, Hoze Mauri, i cili deklaronte disa ditë më parë: "Paketa ka cilësi të ndryshme nga ato të futbollistëve të zakonshëm". Në fakt, përveç Gatuzos, blerja më e re e Milanit ka mahnitur të gjithë ekipin. Fjalët e mira u shoqëruan nga vepra që në takimin e parë, kur braziliani, megjithëse disi i kontraktuar nga emocionet, dhuroi një debutim pozitiv me fanellën e re, teksa gërshetoi idetë me personalitetin.
SINJALE
Paketa ndaj Sampit luajti në territorin që dikur i përkiste Xhakomo Bonaventurës, pozicion delikat sepse duhet të mbrosh e të sulmosh, madje ndonjëherë edhe të thurësh lojën. 21-vjeçari pranoi pa problem rolin, megjithëse i pëlqen të luajë disa metra më para. Lëvizjet e shumta dhe në zona jo të kompetencës janë sinjal që duhet ende të ambientohet, por dukshëm Gatuzo nuk ka asnjë lojtar me cilësitë e brazilianit. Lëvizjet dhe vizioni i tij mund të jenë një zgjidhje e re taktike për Milanin, që përveç dëmtimeve në ekip, ka vuajtur për shumë kohë mungesën e një mesfushori me këmbë të "mëndafshta".
PROTAGONIST
Paketa ndaj Sampdorias nuk u trajtua ashpër, përkundrazi në disa raste i ashpri ishte ai. Mbase është ende herët, por këto janë shenja personaliteti, aq më tepër kur një lojtar në debutim merr përsipër të driblojë përpara zonës së tij dhe t'ia dalë me sukses. Nëse teknikisht është i "pajisur", edhe mendërisht djaloshi përshkruhet si një "sfungjer" që thith çdo informacion taktik që i jepet. Krahasimet dhe paralelizmat duket se nuk i kanë shkaktuar probleme, të paktën jo atij, teksa shokët e mesit të fushës kanë nisur të shqetësohen, pasi Paketa parashikohet të jetë përsëri titullar, që të mërkurën ndaj Juventusit, në finalen e Superkupës.