Pas Manxukiçit, edhe Benatia humb Superkupën
Trajneri Masimiliano Alegri ka një grup të gjerë lojtarësh, por ndërkohë po humb "armë" të rëndësishme, në pritje të finales së Superkupës së Italisë, të mërkurën kundër Milanit, në orën 18:30 shqiptare. Pas sulmuesit Mario Manxukiç, i cili vuan një tërheqje në muskujt e kofshës së majtë, është ndalur edhe mbrojtësi Mehdi Benatia. Ky i fundit pritej që të ishte titullar në 1/8-at e Kupës së Italisë kundër Bolonjas, por një kontraktim muskulor bëri që ai të humbte fanellën e titullarit, por mesa duket edhe mundësinë për të qenë në fushë me Juven, edhe në finalen e Superkupës. Gjithsesi, marokeni pritet që të udhëtojë me skuadrën e tij në Arabinë Saudite.