Solari: Asgjë personale me Iskon, të rinjtë janë një lajm i mirë

Santiago Solari vlerësoi vetëm 3 pikët dhe faktin që Reali kishte në fushën e lojës shumë djem të rinj. Në deklaratën pas fitores me Betisin, numri një i madrilenëve foli edhe një herë për vendimet për të lënë jashtë Iskon dhe Marselon. Por, ai thotë se nuk ka asgjë personale me asnjë lojtar. "Vlera e kësaj ndeshjeje ishin 3 pikët dhe të rinjtë që u aktivizuan si Kristo, Brahim, Valverde, Reguilon dhe Vinicius. Ky është një lajm i mirë për klubin. Mbrojtja me tre? Ishte një vendim i momentit duke parë që kemi shumë dëmtime në repartin e sulmit. Ishte një zgjidhje për këtë ndeshje", tha Solari. Nuk mund të mbetej jashtë vëmendjes fakti që Isko nuk luajti. "Bëmë një ndeshje serioze, pavarësisht atyre që luajtën. Ne jemi një skuadër dhe i përfshijmë të gjithë, ata që luajnë dhe ata që janë në stol. Do të ketë vend për të gjithë sepse luajmë çdo tri ditë. Marselo? E kam thënë që në fillim se unë s'kam asgjë personale. Të gjithë lojtarët që kam në dispozicion do ta kenë shansin e tyre për të treguar vlerat. U lodha duke e përsëritur, por këtu do të luajnë të gjithë", përfundoi Solari. Ai i thuri lavde Sebajosit për golin.