Basketbolli shqiptar në zi, ndahet nga jeta Alfred Isak

Sporti shqiptar ka marrë një lajm të hidhur, pasi ish-basketbollisti elbasanas Alfred Isak, është ndarë nga jeta. Isak shkroi faqe të rëndësishme në historinë e skuadrës elbasanase Labinoti, ku ishte ndër protagonistët kryesorë të atij ekipi në vitet 1970-1980 së bashku me emra të tjerë të mëdhënj si, vëllai i tij Arturi, Suvaria, Biçoku, Dobra, Biçoku, Maternika dhe trajneri Skënder Qorri. Isak, një njeri dhe një sportist model është zgjedhur disa herë edhe në klasifikimin e sportistëve më të mirë të qytetit, duke lënë gjurmë në sportin shqiptar. Familja e basketbollit shqiptar ka humbur një njeri shembull dhe një profesionist të pazëvendësueshëm. Gazeta “Panorama Sport” bashkë me Federatën Shqiptare të Basketbollit i shprehin ngushëllimet më të sinqerta familjes Isak për humbjen e njeriut të tyre më të dashur.