Shkëmbi: Teutës i duhen 2 sulmues, do të firmosja për vendin e tretë

Klubi, gati të sakrifikojë financiarisht për bullgarin

Bledi Shkëmbi është i kënaqur me ecurinë e skuadrës në këtë fazë përgatitore, megjithatë e pranon se dy sulmues janë të domosdoshëm për të përballuar me sukses gjysmën e mbetur të kampionatit. Në një prononcim të dhënë për “SuperSport”, tekniku korçar ka folur edhe në lidhje me zërat që kanë dalë së fundmi në merkato, teksa nuk ka preferuar të japë emra konkretë. “Çdo gjë po shkon mirë, është e rëndësishme se në këtë fazë përgatitore nuk kemi lëndime. Të gjithë futbollistët po marrin ngarkesën e duhur fizike. Akordi me Vasilev? Nuk do të ishte korrekte nëse do të përmendja emra. E rëndësishme është që sa më shpejt të mbyllim një sulmues, ndoshta edhe dy, për të qenë gati për kampionatin. Mund të ketë përforcime edhe në ndonjë repart tjetër, sigurisht nëse do të ketë cilësitë e duhura. A do firmosja për vendin e tretë në kampionat? Patjetër që po, por si futbollist. Si trajner e kam të qartë se llogaritë bëhen në fund, jo pas dy fazave. Kemi bërë diçka të mirë deri tani”, u shpreh 39-vjeçari i pankinës durrsake.

SULMI - E gjithë situata ka ndryshuar në Durrës. Latif Amadu u shit dhe skuadra nuk ka një sulmues të mirëfilltë, rol të cilin të paktën në ndeshjet miqësore e ka kryer Gerhard Progni. Synimet dhe objektivat e skuadrës në këtë sezon nuk u lejojnë të eksperimentojnë dhe për më tepër në sulm, pasi është dhe një gjysmësezoni për të luajtur. Skuadra ka një synim të ri, një 28-vjeçar, i cili është pjesë edhe e kombëtares bullgare. Radoslav Vasilev është lojtari që shihet si zëvendësuesi i Latif. Negociatat vijojnë dhe akordi duket shumë pranë, megjithatë burime të gazetës thonë se pengesa e vetme po krijohet prej pretendimeve financiare të larta të sulmuesit, i cili momentalisht është pjesë e skuadrës Cherno More. Gjithsesi, duket se klubi do të bëjë një sforco të madhe për të sjellë në klub një “bomber” që siguron gola për pjesën e mbetur të sezonit. Është përfolur edhe pista “Bushiç”, por ky transferim nuk mund të realizohet pa mbyllur kroati “hesapet” me Flamurtarin. Lëvizje të shumta nga ana e drejtuesve të Teutës që prej javës së fundit të dhjetorit. Pa gjetur lojtarin-gol, askush nuk do të ketë qetësi në kampin durrsak dhe sidomos tani që është shtuar oreksi për titullin.

BARAZIMI - Ndeshja e fundit miqësore përballë Kastriotit solli barazimin e parë të këtij viti për Teutën. Nuk është një rezultat që ngroh, por gjithsesi skuadra dhe stafi ka kohën e duhur në dispozicion për të korrigjuar çdo gjë. U bë e dyta herë që ndëshkohen të parët, të shtunën nuk mundën që të shkonin drejt përmbysjes, si ndaj Erzenit. Ajo që mbetet pozitive është fakti që bregdetarët dinë të reagojnë, pavarësisht disavantazhit. Gjithsesi, ajo që shqetëson më shumë stafin është fakti se pësojnë.

PËRGATITJET - Te Teuta prej ditësh punohet me dy seanca në ditë dhe me ngarkesë maksimale. Pasi kanë kryer të gjitha testet e duhura dhe gjithçka duket rrugën e duhur, para se të startojë kampionati, stafi teknik ka planifikuar edhe dy miqësore, ndërsa do të matin forcat me Laçin dhe Skënderbeun.