Kastrati: Jeta e gjyqtarëve në rrezik, mendojmë bojkotin
Presidenti i Shoqatës së Arbitrave, Tahir Kastrati, e cilësoi alarmante situatën në futbollin shqiptar pas rastit të fundit, ku u dhunua gjyqtari lezhjan, Eldorian Hamiti. "Ky është një moment i vështirë i futbollit shqiptar. Së fundmi ndodhi një ngjarje shumë e rëndë, që trondit çdo njeri pas pamjeve të tilla kaq të rëndomta. Edhe në fushat më të rënda të jetës nuk ndodhin incidente të tilla. Jeta e gjyqtarëve është në rrezik dhe para jetës së njeriut nuk mund të vendosim asnjë. Duke marrë shkas nga kjo ngjarje, ne si Shoqatë e Arbitrave, kërkojmë me forcë që të bëhet çmos për të ndaluar dhunën e ushtruar ndaj arbitrave. Kjo dhunë sa vjen dhe thellohet, si rrjedhojë e veprimeve dhe mosveprimeve të policisë në stadiume. Të shqetësuar, të kërcënuar dhe të pambrojtur në çdo ndeshje kudo në Shqipëri, ne kërkojmë urgjentisht të rikthehet policia në stadiume për të shmangur përsëritjen e ngjarjeve të tilla të shëmtuara. Do të mblidhemi si Komitet Ekzekutiv i Shoqatës dhe mund të marrim masa ekstreme deri në bojkotimin e aktivitetit në rast se nuk merren masa për të shmangur ngjarje të rënda si kjo e fundit, të cilat rrezikojnë seriozisht jetën e njeriut", është shprehur fillimisht kreu i Shoqatës së Arbitrave.
MUNGESA E DREJTUESVE
Kastrati tregoi në konferencën e djeshme për shtyp se në trajnimet që janë bërë me klubet sa u përket interpretimeve në rregullore, çuditërisht kanë munguar drejtuesit e tyre. "Ne kemi si detyrë kryesore të merremi me edukimin e arbitrave. Kjo bëhej në mënyrë sistematike dhe korrekte. Është një komision që është ndarë në tre nënkomisione që ndjek edukimin, trajnimin dhe përgatitjen në të gjitha komponentët e arbitrave. Probleme ka dhe do të ketë, por lufta jonë është që t'i minimizojmë. Kemi një bashkëpunim me klubet direkt, për t'i mbrojtur ata që të mos kenë penalitete. Në këtë periudhë kemi bërë me të gjitha klubet takime me video-projektor, duke interpretuar rregullat. E kemi bërë për t'i ndërgjegjësuar ata, në mënyrë që të mos ndodhin incidente. Kjo punë që është bërë ka dhënë rezultat, sepse deri diku marrëdhëniet me lojtarët kanë qenë korrekte. Në këto seminare prezent duhet të ishin edhe drejtuesit e klubeve, përveç trajnerëve, por ata nuk kanë qenë të pranishëm. Ata janë njerëzit kryesorë që duhet të jenë në këto trajnime", theksoi Kastrati, i cili është edhe anëtar i Komitetit Ekzekutiv në Federatën Shqiptare të Futbollit.
KONTRADIKTA NË LIGJ
Sipas Kastratit, ligji që ka lënë jashtë stadiumeve policinë është kontradiktor. "Neni 51 i ligjit për policinë thotë se ruajtja e rendit dhe sigurisë publike në mjediset sportive është detyrë institucionale e organeve të Policisë së Shtetit. Në pikën tjetër të nenit ndodh që policia ia delegon këtë detyrë policisë private përmes administratorëve të klubeve. Pra, detyrohen klubet dhe policitë private që të kryhen detyra, të cilat në kushtet ku ndodhet vendi ynë, nuk kanë asnjë mundësi që të kryhen. Më shumë se kushdo tjetër, Policia e Shtetit e kupton që këto nuk mund t'i kryejë. Atëherë, këtu kemi një kontradiktë brenda ligjit. Përderisa policia ka për detyrë të ruajë mjediset sportive, nuk mund t'ia delegoj dikujt tjetër", deklaroi presidenti i arbitrave, i cili në fund sqaroi edhe bashkëpunimin me FSHF. "Ne nuk kemi pasur të mundur që të kemi edhe sponsor real, pasi çdo gjë në Shqipëri paragjykohet. Mendoni të kishim një sponsor, që mund të kishte lidhje edhe me një klub. Nuk duhet të paragjykohet në këtë drejtim bashkëpunimi ynë me FSHF-në", përfundoi Kastrati.