Ndeshjet me “silenciator”, Teuta tremb Partizanin

Durrsakët kanë fituar 2 herë në kryeqytet, të kuqtë në Elbasan

Partizani-Teuta, e vlefshme për javën e 25-të të Superiores do të luhet të premten, në orën 18:00 në stadiumin "Selman Stërmasi". Ndonëse është një duel mes dy skuadrave pretendente për titull, takimi do të luhet në një ambient "të vdekur", pasi Partizani është i dënuar nga Disiplina që të luajë dy ndeshje pa tifozë si skuadër pritëse. Nëse para një jave luajtën derbi në praninë e mbi 9 mijë tifozëve, kësaj radhe të kuqtë do të përballen ndaj Teutës para 30 të ftuarve në tribunën VIP, si dhe përfaqësuesve të medias. Duelet mes dy ekipeve me Partizanin pritës po bëhen thuajse periodike, që çdo vit të luajnë një herë pa tifozë. Të premten do të jetë hera e katërt në 39 muaj që Partizani pret një ndeshje me "silenciator" ndaj durrsakëve. Por, historia e takimeve të tilla i tremb disi të kuqtë para kësaj sfide, pasi 2 nga 3 ndeshjet e fundit pa tifozë janë fituar nga miqtë nga Durrësi. Takimi i 23 dhjetorit të 2015-ës, zhvilluar në stadiumin "Qemal Stafa" u fitua nga Teuta me golin e Lukiç. Më 26 nëntor 2016, Partizani luajti pa tifozë ndaj "djemve të detit" në "Elbasan Arena", takim i fituar nga të kuqtë me rezultatin 1-0, me gol të Ekubanit. Ndeshja e fundit ku Partizani e ka pritur Teutën pa tifozë u luajt vjet, më 5 maj 2018, ku durrsakët fituan 3-1 në "Selman Stërmasi". Golat për Teutën i shënuan Çyrbja, Hrkaç dhe Hila, ndërsa për "demat" realizoi Batha. Nisur nga këto 3 ndeshje të luajtura

pa tifozë, ku Partizani është pritës, del se Teuta ka fituar 2 herë në kryeqytet, ndërsa të kuqtë i kanë mposhtur në "Elbasan Arena". Mbetet për të parë se cila do të jetë trajektorja e përballjes së radhës pa tifozë mes Partizanit dhe Teutës, ku të kuqtë duan të kthehen te fitorja.