Ish-ët në unison: Ndaj Kukësit u pa një Luftëtar pa gjak dhe motiv
Të humbësh me Kukësin, s'është fundi i botës. Ky është opinioni i legjendës së futbollit gjirokastritit, Luan Seti, dhënë për "Panorama Sport" dy ditë pas humbjes 3-0 të bluzinjve në "Elbasan Arena". Por, për Seitin humbja djeg, pasi në fushën e lojës mungoi nervi dhe grinta. "Në ndeshjen e fundit me Kukësin konstatova lojtarë pa motiv dhe 'pa gjak' në fragmente të caktuara. Kam bindjen se te Luftëtari ka lojtarë jashtë formës sportive. Në një fushë si ajo e stadiumit "Elbasan Arena", tanët e patën mundësinë për të shprehur cilësitë e lojtarit profesionist. Është koha të shohim para. Të jemi sa më afër skuadrës dhe në mbështetje të saj. S'dua të përsëris vetveten, por Luftëtari e ka potencialin e mjaftueshëm për të qenë pjesë e Kategorisë Superiore në sezonin e ardhshëm", u shpreh Luan Seiti. KALLUCI- Në unison me Seitin është ish-shoku i skuadrës te Luftëtari, njëkohësisht edhe ish-trajner në vitet 1992-1994, Theodhori Kalluci. "Kukësi është skuadër për t'u pasur zili. Ka në organikën e tij lojtarë me peshë. Edhe ndaj nesh diferencën e bënë lojtarët me eksperiencë. Nga çka pashë në pjesën e parë, më duhet të pranoj se elementë të veçantë shfaqën shenja lodhjeje, pse jo dhe mungesë përgjegjshmërie. Zëvendësimet e trajnerit Julian Ahmataj rezultuan të suksesshme, jo për rezultatin final, por për mënyrën e interpretimit të lojës në pjesën e dytë. Ka ikur koha e gradave. Në futbollin e sotëm kam bindjen e plotë se s'ka lojtarë të pazëvendësueshëm. Trajneri meriton vlerësim maksimal për gjithçka bëri në lëvizjet pas përfundimit të pjesës së parë. Lëvizjet e zgjuara të trajnerit Ahmataj e rikthyen në identitet Luftëtarin. Të humbësh me Kukësin, s'do të thotë kapitullim, përkundrazi më shumë forcë dhe kurajë për misionin mbijetesë", u shpreh Kalluci. PËRGATITJET- Me seancën stërvitore të ditës së djeshme në "Fushën e Vjetër" bluzinjtë e Ahmatajt kanë nisur javën përgatitore për ndeshjen me Kamzën. Luftëtari luan në shtëpi dhe çdo rezultat tjetër, veç fitores, do ta komprometonte objektivin për qëndrimin në Superiore. Të diferencuar nga grup dje u stërvitën qendërmbrojtësi Dhimitris Koconis dhe mbrojtësi i majtë, Xhekson Ferriera.