Apolonia mbetet në krizë, mungon sulmuesi që shënon

Fierakët kanë një luftë të vështirë për mbijetesën

Barazimi me Tomorin të shtunën që lamë pas ka nxjerrë edhe një herë në pah problemin më të mprehtë të Apolonisë: mungesën e një sulmuesi tipik dhe paaftësinë në grup të skuadrës për të shënuar gol. Ndaj beratasve, fierakët kanë humbur më së paku 4 momente flagrante goli: dy herë me Hysenshahajn dhe dy raste të tjera me protagonistë Jovanoviç dhe Buzi. Nuk është se Apolonia ka zhvilluar ndonjë ndeshje kushedi çfarë, por 4 raste të pastra për gol nuk janë pak, sikurse mosrealizimi i asnjë goli të vetëm me kaq raste të krijuara, është tregues tipik për ofensivën apatike të këtij ekipi. Gjithsesi, fierakët mbajnë vendin e dytë në ndarjen e mbijetesës në Grupin B të Kategorisë së Parë, duke pasur poshtë vetes plot tri skuadra: Tomorin, Elbasanin dhe Turbinën. Nuk është se Apolonia premton shumë me këtë nivel loje që po prezanton, por forma jo e mirë e Elbasanit dhe cërrikasve, si dhe diferenca në pikë me këto kundërshtare, u jep disi garanci fierakëve, ndonëse "matematika futbollistike" nuk njeh logjikë (pa harruar që kjo pjesë e kampionatit të Kategorisë së Parë sjell edhe të papritura të formave të larmishme). Këtë javë bardhejeshilët kanë një mundësi ideale për të fituar e për të hedhur një hap të rëndësishëm mbijetese, pasi do të luajnë sërish në fushën e tyre, kundër Elbasanit të vendit të parafundit, ndeshje e lehtë në letër për myzeqarët, por verdheblutë janë ekipi që kanë fituar pastër 2-0 fazën e dytë në Fier, e vetmja humbje e Apolonisë me dy gola diferencë gjatë këtij sezoni. U fry artificialisht situata përpara ndeshjes Apolonia-Tomori, a thua se në Fier nuk do të zhvillohej ndeshje futbolli, por "luftë për pushtim kalaje". Por, në të nuk ndodhi asgjë.