Të rinjtë premtues, Strakosha më i miri i javës në Serinë A
"Spektakolar, i kujdesshëm dhe stoik, shqiptari... garanci"
Në çdo javë, në Itali përzgjidhen lojtarët më të mirë, formacioni më i mirë dhe pse jo, goli më spektakolar i Serisë A. "Gazetta Dello Sport" ka bërë edhe një sondazh referuar futbollistëve nën 23 vjeç, për të parë votuesit se cilin kanë preferuar si më të mirin e kësaj jave. "Fituesi është... Thomas Strakosha", nis shkrimi dhe editoriali special referuar gardianit të Kombëtares shqiptare nga mediat prestigjioze italiane. "Thomas Strakosha fitoi konkursin javor të "Gazzetta Dello Sport". Portieri i Lacios, protagonist i fitores së bardhekaltërve në derbin me Romën, ka mposhtur konkurrencën duke fituar bindshëm përballë Zheremi Boga i Sasuolos (paraqitje e shkëlqyer ndaj Milanit) dhe Ignacio Puseto i Udinezes (goli kundër Udinezes mund të ishte i vlefshëm sa ari në llogaritë e mbijetesës). TRI CILËSITË Pritjet e Strakoshës kanë bindur votuesit e Gazzetta.it: Është edhe meritë e portierit shqiptar, tashmë një pikë referimi prej kohësh për Simone Inzagin, nëse Lacio nuk pësoi në fitoren 3-0 ndaj Romës në derbin e zjarrtë të kryeqytetit. Mes të tjerash, të paktën tri cilësi të shfaqura: I kujdesshëm si në momentin kur neutralizoi gjuajtjen e hidhur të Dzekos. Spektakolar si në momentin kur shpëtoi portën e Lacios nga goditja e Florencit me trajektoren e çmendur. Stoik, për të qëndruar në fushë deri në fund të ndeshjes me gjithë dhimbjet e forta në shpatull. I PALODHSHËM Keqardhje për shpatullën, pikërisht për faktin se deri më tani Strakosha nuk ka humbur asnjë minutë me Lacion (përjashtuar ndeshjes së shtyrë me Udinezen) deri në këtë moment të kampionatit, duke u bërë i palëvizshëm nga formacioni bardhekaltër. Një ngjitje që filloi më 20 shtator 2016, kur shqiptari në pak orë, nga portieri i tretë e gjen veten titullar në sfidën kundër Milanit në "San Siro", pas dëmtimit të Marketit. Intuita e Inzagit, i cili e njihte portierin shqiptar që nga periudha kur drejtonte të rinjtë e Lacios, rezultoi fituese. Në pritje për të mësuar shkallën e dëmtimit që Strakosha ka pësuar në shpatull, Lacio gëzon "saraçineskën bllokuese" falë pritjeve të tij. Nuk është rastësi që prapavija e Lacios është mbrojtja e katërt më e mirë e kampionatit", ka përfunduar "Gazzetta Dello Sport" specialen kushtuar Thomas Strakoshës.