Devolli i pamposhtur në derbi, Maliqi bën “vetëvrasje”
Rreth 2 mijë tifozë dhurojnë spektakël në stadium
Devolli mposhti Maliqin në derbin e juglindjes, duke "vrarë" përfundimisht ëndrrën e vendësve, të cilët janë dorëzuar pas kësaj disfate të hidhur në shtëpi. Goli i sulmuesit Arlind Xaka në minutën e 16-të, ishte ai që vulosi takimin në një atmosferë elektrizuese, ku ishin të pranishëm afro 2 mijë spektatorë.
NDESHJA
Të besuarit e trajnerit Mema e nisën në sulm ndeshjen, duke provuar me Ametlliun dhe Trenin, por pa sukses. Kur pritej goli i vendësve, ishin miqtë nga Devolli që surprizuan duke kaluar në avantazh. Pas një harkimi të Kames nga goditja e dënimit, Xaka i ka shpëtuar mbulimit të mbrojtjes dhe me një goditje të kalibruar me kokë brenda zonës, ka gjetur rrugën e rrjetës, duke çuar peshë zemrat e tifozëve të ardhur nga qyteti i Bilishtit. Pas këtij momenti, skuadra e Maliqit u hodh në sulm në kërkim të golit të barazimit, por pa sukses. Bardhekuqtë duket se nuk ishin në ditën e tyre më të mirë, teksa rastet e rrezikshme ishin me pikatore. Meritë për këtë fitore kanë pa dyshim futbollistët e Devollit me në krye trajnerin Stavri Nica, që arritën të mbanin larg portës Maliqin, duke u larguar nga fusha me një 3pikësh të artë. Vlen për t'u theksuar se kjo sfidë ishte shumë e luftuar dhe me emocion, por për meritë të gjyqtarëve, të cilët u treguan profesionistë, si dhe të delegatit Eduart Gjini, gjithçka shkoi mirë dhe nuk pati kontestime nga futbollistët dhe tifozët e shumtë të pranishëm në fushën sportive "Jovan Asko". Me triumfin e djeshëm, Devolli e thelloi diferencën në +6 nga skuadra e Maliqit, teksa javën e ardhshme ekipi i Nicës do të udhëtojë drejt Këlcyrës, ndërkohë që maliqarët do të jenë mysafirë në Tiranë për t'u përballur me Termin.