Kapllanaj: Jemi në formë, Bylis kap elitën

Presidenti i klubit ballshiot është i bindur se skuadra do kthehet sërish në Superiore

Pas përfundimit të ndeshjes me Lushnjën, kryetari i Bashkisë së Ballshit, Agron Kapllanaj, njëherësh president nderi i KF Bylis, deklaroi se skuadra ballshiote është skuadra më e mirë e Grupit B dhe pretendenti kryesor për elitën. Ballshiotët kaluan një transfertë të vështirë në Lushnjë, duke fituar me rezultatin e pastër 2-0 ndaj skuadrës vendëse dhe janë +3 pikë nga Besa.

KAPLLANAJ

Në një prononcim për gazetën në lidhje me ecurinë e skuadrës dhe synimin për rikthimin në Superiore, presidenti i klubit shprehet: "Kampionati i Kategorisë së Parë është një garë shumë e gjatë dhe me katër faza. Për më tepër është një kampionat, që jo vetëm ekipet ndahen në dy minigrupe, por u përgjysmohen pikët pas përfundimit të dy fazave. Çfarë do të thotë? Nëse Bylisi ishte 7 pikë më shumë se Besa apo 15 pikë më shumë se Lushnja, ndjekësit për shkak të formulës u gjendën: Besa me 3 pikë më pak dhe Lushnja me 7 pikë më pak. Kjo formulë dëmton atë që ka pikë më shumë. Mendoj se e kemi kaluar me sukses ndeshjen e parë të fazës së tretë. Një sfidë në fushën e Lushnjës, aty ku 'derbi' i qarkut shpalos vlera gjithmonë. Edhe në atë pak nervozizëm, në fushë apo edhe në shkallë, por brenda kornizës së duhur. Të dielën ka fituar ekipi i Bylisit, që ishte ekipi më i mirë në fushën e lojës. Nuk jemi rastësisht në vendin e parë dhe pretendenti kryesor për Superioren. Jemi në krye sepse jemi skuadra më e mirë", deklaroi për gazetën "Panorama Sport" kryetari i Bashkisë së Ballshit, Agron Kapllanaj. Bylis nën drejtimin e trajnerit Veljko Dovedan ka bërë një paraqitje shumë të mirë gjatë të gjithë kampionatit dhe do të kërkojë që të ruajë këtë ritëm deri në fund. Bylis është një prej pretendentëve kryesorë për ngjitjen në Superiore.