“Elliott”, ja plani për Milanin në rast Champions-i
Dy anësorë dhe blerja e Bakajokos, në krye të listës
Objektivi sezonal i Milanit dihet që është kualifikimi në edicionin e ardhshëm të Ligës së Kampionëve. Me ekipin në vendin e tretë, ëndrra Champions duket më e prekshme. Në rast realizimi të këtij misioni nga ana e djemve të Gatuzos, pronarët e klubit do të nisin punën për të përforcuar skuadrën për sezonin e ri. Lajmin e ka raportuar "Tuttosport", e përditshmja italiane sipas së cilës në "Casa Milan" po thuret plani që do ta bëjë edhe më konkurrues "Djallin".
BLERJA E BAKAJOKOS
- Siç thamë, në rast Champions-i do të kryhen disa ndërhyrje. E para do të jetë blerja e Tiemue Bakajokos, i cili këtë sezon luajti me kuqezinjtë i huazuar nga Çelsi. Mesfushori e ka treguar me fakte se i vlen 38 milionë eurot, të cilat me shumë gjasa do të derdhen në arkat e "bluve" në verë. Leonardo do të tentojë të ulë vlerën e operacionit, duke synuar në dëshirën e Bakajokos për të vijuar karrierën te Milani. Në listën e drejtuesve janë edhe dy anësorë sulmi. I pari është Alan Sen Maksimë i Nisës, me të cilin është arritur një akord për pagën, teksa duhet gjetur ende ai me klubin. Emri i dytë është ai i Everton të Gremios, me 22-vjeçarin që monitorohet nga afër prej vëzhguesve kuqezi.
- Përveç të sipërpërmendurve, "Elliott" dëshiron edhe një kampion në gjirin e Milanit 2019-20. Megjithëse nuk po zhvillon një sezon fantastik, Sergej Milinkoviç-Saviç mbetet ëndrra e pronarëve amerikanë të "Djallit". Burime pranë kuqezinjve bëjnë të ditur se krerët janë të bindur se mund të marrin konsensusin e Lacios për një shumë rreth 80 milionë euro. Bisedat me Klaudio Lotiton dhe drejtorin Igli Tare nuk janë kurrë të lehta, me palët që tashmë janë të vetëdijshme se Milinkoviç-Saviç nuk vlen më mbi 120 milionë euro. Mund të jetë serbi goditja e Milanit në mesfushë, ku duhet të mbërrijë edhe një regjisor. Kandidaturat janë ajo e Julian Vaigel i Borusias së Dortmundit dhe Stefano Sensit, me këtë të fundit dukshëm të favorizuar.
ËNDRRA SERBE