Nostalgjiku Braho: Duelet mes Luftëtarit e Partizanit i përjetoj me emocion

Ish-sulmuesi: Për “demat”, rëndësi ka përballja me Kukësin

Sefedin Braho, “Mjeshtri i Merituar i Sportit”, në një prononcim për “Panorama Sport” tregon se përballjet mes dy ekipeve ku ka luajtur, Partizani dhe Luftëtari, sjellin emocion për legjendën e futbollit gjirokastrit. Sipas Brahos, të kuqtë duhet të kenë kujdes përballjet me Kukësin, në mënyrë që të dalin kampionë. Braho sjell edhe pak histori nga periudha ku si i kuq ka luajtur ndaj Luftëtarit.

Sefedin, nëse kthehemi pas në kohë, mund të na kujtoni diçka nga eksperienca juaj në lidhje me duelet mes Partizanit dhe Luftëtarit?

Nga natyra nuk jam njeri mediatik, ndonëse “Panorama Sport” mundet shpesh të më ngacmojë për të zgjuar të shkuarën. E kam pasur gjithmonë të vështirë që të flas për mediat. Kur bëhet fjalë për sfidat Luftëtari-Partizani dhe anasjelltas përjetoj emocione dhe nostalgji. Më kujtohet se me Partizanin, si pjesë e tij, kemi dalë dy herë në finale të Kupës. Në vitin 1973 kemi mundur Dinamon 1-0, ndërkohë më 1974 na ka mundur Dinamo 1-0. Sinqerisht, ju them se në vitet tona futbolli luhej për njerëzit dhe emrin e klubit. Kishte pak rëndësi nëse luhej për Kupë apo për kampionat.

Jeta juaj është e lidhur me emrin e Luftëtarit. Mbani mend ndonjë të veçantë në përballjet me Partizanin në Kupë?

Fituam ndeshjen e fundit të kampionatit 4-0. Është viti 1978-1979, ku u shpallëm nënkampionë, por u eliminuam nga Partizani në Tiranë pas humbjes 5-1 në Kupë. Me sa kujtoj, fituam ndeshjen e parë 2-0 në Gjirokastër, rezultat që s’na shërbeu për turin pasardhës.

Për dy ditë Luftëtari do të luajë aktin e parë të turit çerekfinal.

Si e shihni fundin e 90minutshit të mesjavës?

Jam i mendimit se verdiktin e kualifikimit do ta vendosë ndeshja e parë. Nga rezultati që do rezervojë takimi që do të luhet pa tifozë do të marrë jetë objektivi i Luftëtarit dhe Partizanit në Kupë. Logjikisht, Partizani ka më shumë mundësi për të prekur gjysmëfinalet, por edhe Luftëtari e ka mundësinë “e artë” për ecur më lart në këtë kompeticion.

Në karrierën tuaj të gjatë sportive, ju ka ndodhur të përjetonit skena dhune ndaj gjyqtarëve?

Jam i rezervuar të jap përgjigje korrekte, jo se s’ka pasur të tilla ngjarje, por deri në këtë fare feje jo. Jam i mendimit absolut se rikthimi i forcave të rendit në stadium është domosdoshmëri jetike. Vetëm ligji i shkruar dhe zbatimi rigoroz i tij frenon çdo akt dhune. Të gjithë janë djem nënash dhe meritojnë mbrojtje, edhe pse ka raste për t’u veçuar në arbitrim. Për sa kohë mungon qytetaria dhe përgjegjshmëria në radhët e njerëzve pranë klubeve dhe tifozëve fanatikë, prania e forcave të rendit në një ndeshje futbolli është një mundësi më shumë për mbarëvajtjen e garës.

Si produkt i Luftëtarit dhe ish-lojtar i Partizanit, ku i shikoni këto dy ekipe në fund të sezonit?

Kampionati është i hapur për Partizanin. Nëse s’do të bëjë blofe, jam i bindur se do të marrë maksimumin. Për Partizanin e rëndësishme është përballja me rivalin direkt, Kukësin. Ndërsa Luftëtari vjen me moral të lartë pas fitores 3-0 në tavolinë me Kamzën dhe kështu ka “oreksin” për të kërkuar më shumë. Një rezultat i pritshëm pozitiv ndaj Skënderbeut për Luftëtarin do të ishte frymëmarrje më shumë për t’u përballur denjësisht me Partizanin. Historia do vite të rikthehet dhe statistikat janë bërë për t’u thyer, por unë nuk e çoj në mëndje përsëritje të së shkuarës së afërt apo të largët.