Kupa, ‘demat’ 12 vite pa gjysmëfinale
Të kuqtë e kryeqytetit i synojnë të dy trofetë, beteja nis nga Luftëtari
Shtyrja e javës së 25të të Kategorisë Su periore nga bojkotimi i arbitrave ka bërë që Partizani ta ndryshojë fokusin e përgatitjeve. Të besuarit e trajnerit Skënder Gega ndiheshin gati për sfidën e planifikuar për të premten e 8 marsit, por nuk e kanë ndërprerë punën, pasi mendohet se të martën do të zbresin në fushë ndaj Luftëtarit, e vlefshme për turin çerekfinal të Kupës së Shqipërisë. Trajneri Skënder Gega e ka deklaruar që para përballjes së turit të dytë në Kupë me Kastriotin, se edhe ky trofe synohet nga Partizani, i cili duket se dëshiron të fitojë gjithçka në këtë sezon futbollistik. Partizani e ka fituar trofeun e fundit para 15 viteve, pikërisht Kupën e Shqipërisë në 2004-ën, ku mposhtën në finale Dinamon me golin e mbrojtësit Henri Ndreka. Partizani i këtij sezoni, me sa duket
është i destinuar të thyejë tabutë. Fillimisht kërkohet titulli kampion, që për herë të fundit është fituar në sezonin 1992-1993. Për këtë trofe duken në rrugë të mbarë, por duhen kaluar edhe 12 pengesa të tjera për
të shkuar në fund. Tersi i ka ndjekur “demat” edhe në veprimtarinë e Kupës së Shqipërisë, që është kthyer në makth, pasi prej 12 sezonesh nuk kanë arritur që të shkojnë në gjysmëfinale. Për herë të fundit, Partizani ka shkuar në gjysmëfinale në sezonin 2006-2007, ku është eliminuar nga Teuta me dy barazime, 0-0 në Durrës dhe 1-1 në kryeqytet. Më pas paraqitja e të kuqve në Kupë është shoqëruar me një trajektore në rënie. Pika më e errët është fiksuar në edicionin 2011-2012, ku janë eliminuar në turin paraeliminator nga Sukthi. Skuadra e trajnerit Skënder Gega ka mundësinë që të thyejë tabunë 12-vjeçare të klubit në Kupë për të shkuar në gjysmëfinalen e këtij kompeticioni. Ndonëse shorti duket i favorshëm për të kuqtë, historia nuk është në favorin e “demave”, pasi Kupa ka rezultuar si një veprimtari turpërimi për të kuqtë edhe në epokën “Demi”. Para dy sezonesh ishte Besëlidhja që militonte në Kategorinë e Parë, që i eliminoi në turin e dytë. Përveç këtij eliminimi surprizë nga lezhjanët, Kupa e Shqipërisë ka rezultuar edhe si një mundësi e dështuar e Partizanit për të krijuar aleanca, por që në fund nuk i kanë vlejtur. Për dy vite me radhë, kryesisht në sezonin 2014-2015, ku janë eliminuar nga Laçi në çerekfinale, ka pasur zëra se të kuqtë kanë lëshuar përkundrejt kundërshtarit, në mënyrë që ta kishin si aleat në kampionat. Por kjo aleancë e përfolur nuk ka rezultuar efikase, pasi jo vetëm që u larguan me njollë nga Kupa, por mbeten edhe jashtë luftës për kampion.