"Pa polici, arbitrat mund të komprometojnë garën"
Vendimi i Shoqatës së Arbitrave ka ndërprerë të gjitha aktivitetet futbollistike në vend, ndërsa sipas të gjitha gjasave, nga nesër do të rifillojnë me Kupën e Shqipërisë. Takimi i ditës së sotme mes FSHF dhe klubeve me kryeministrin Rama do të vendosë nëse policia do të rikthehet ose jo në stadiumet tona. Sipas presidentit të Shoqatës së Arbitrave, Tahir Kastrati, kjo është një kërkesë bazike, jo vetëm për sigurinë, por edhe për ndershmërinë e garës. Gjatë një bisede për "Top Channel", ai tregon pasojat e mungesës së policisë në stadiume dhe impaktin që kanë tek arbitrat dhe gjykimi. "Nëse nuk ka polici në stadiume, as arbitri nuk mund të marrë vendime të drejta dhe mund të komprometojë garën. Në rast se nuk do të rikthehet policia, bojkoti do të vazhdojë. Ne vijmë nga një sistem totalitar, ku vetëm polici mund të mbajë rendin dhe sigurinë", deklaroi presidenti i Shoqatës së Arbitrave shqiptare. Kujtojmë që arbitrat bojkotuan prej incidentit pas ndeshjes Kamza-Laçi 1-1, ku u dhunua gjyqtari Eldorian Hamiti.
SITUATA
Gjatë javës që lamë pas u luajtën vetëm disa miqësore mes ekipeve të Superiores, Kategorisë së Parë dhe të Dytë. Nga ajo që u pa, ata që gjykuan ishin thuajse të gjithë ish-arbitra. Madje, FSHF urdhëroi të gjitha kolegjiumet që mos t'iu përgjigjeshin klubeve në qytetet përkatëse nëse u kërkohej të gjykonin takimet miqësore. Nga sot situata pritet të ndryshojë pas takimit me kryeministrin Rama, i cili për problematikën që ka shoqëruar futbollin shqiptar në javën e kaluar fillimisht pati një bisedë kokë më kokë me presidentin Duka.