Rumenige: Dua të largohem duke fituar Champions-in
“Strategji për të kapur Anglinë. S'do ta drejtoj kurrë FIFA-n”
Legjendë e Bajernit për një dekadë në fushë (1974-1984), prej 2002, drejtues po aq i spikatur në "Säbener Strasse". Shefi i bordit të Bajernit, KarlHainc Rumenige, lëshon një intervistë për bavarezen "Abendzeitung", ku 63-vjeçari prek çdo temë të mundshme, nga e ardhmja e tij, deri te merkatoja dhe përballja me futbollin anglez.
Dikur keni thënë se Tomas Myler është një bavarez, si ta largojmë atë? Tani ai, Humels dhe Boateng janë përjashtuar nga kombëtarja. Çfarë të ardhme e pret Mylerin te Bajerni?
Tomas ka qenë gjithnjë një lojtar i rëndësishëm për ne, jo thjesht sepse është bavarez. Ai s'ka luajtur gjatë javëve të fundit, por është i besueshëm, inteligjent dhe dikush që di ta menaxhojë këtë situatë.
A është objektivi juaj dhe i Hënesit për ta ruajtur origjinën bavareze të skuadrës?
Kemi tentuar gjithnjë të sjellim lojtarët më të mirë gjermanë te Bajerni. Kjo reflektohet me transferimet e Kimishit, Zyles, Gnabrisë dhe Goreckës. Duam të ruajmë bazën e një klubi gjerman, duke afruar më pas lojtarë kalibri nga jashtë.
Me lojtarë si Verner dhe Haverc, të cilët pritet të vijnë te Bajerni?
Nuk dua t'i komentoj këto zëra tani. Lojtarët kanë kontratë me klubet e tyre.
Në rastin e Vernerit, Bajerni nuk ka presionin e kohës. Kontrata e tij skadon në 2020-ën. Dhe me Levandovskin ka një sulmues shumë të mirë, i cili mund të luajë edhe për disa vite.
Robert është ende një nga qendërsulmuesit më të mirë në botë. Çdo vit shënon rreth 30 gola në kampionat dhe nuk duhet vënë në diskutim. Mendoj se debati i hapur, veçanërisht në "Sky", është një absurditet.
Kur do rinovojë Levandovski? Kontrata aktuale i skadon në 2021-shin.
Robert është një profesionist i vërtetë. Edhe pse ka mbushur 30 vjeç, ai përgatitet në mënyrë profesionale, duke nisur nga ushqimi i mëngjesit dhe mbyllet me stërvitjen. Ai ka edhe një avantazh të madh, që nuk dëmtohet kurrë. Nuk ka asgjë të keqe të flasim me menaxherin e tij në një moment.
Si është situata me Humelsin dhe Boatengun, që të dy kanë ende kontratë, por shtohet konkurrenca?
Dihet që tashmë do vijë Pavar. Por, tani do bënim mirë të përqendroheshim tek e tashmja. Kemi një javë të rëndësishme dhe të vështirë përpara dhe do të ishte mirë sikur të ishim të suksesshëm, veçanërisht ndaj Liverpulit, ndaj të cilëve duhet të luajmë me zgjuarsi dhe me vendosmëri të madhe për të fituar.
Jeni i bindur se do të kualifikoheni?
0-0 i ndeshjes së vajtjes ishte një rezultat i mirë, por nuk garanton ende kualifikimin. Do ishte e rëndësishme për të gjithë Bundesligën, që të paktën një ekip gjerman të shkonte në çerekfinale.
Edhe për shkak se futbolli anglez e ka lënë pas atë gjerman?
Edhe kështu është. Dy klube angleze janë kualifikuar dhe me Sitin ndoshta edhe një tjetër. Ne ishim të dytët në klasifikimin 5-vjeçar të UEFA-s. Nëse Bajerni nuk do të ishte kaq i suksesshëm në vitet e fundit, atëherë ndoshta do të kishim probleme të mbanim edhe vendin e katërt.
Si mund t'i arrijnë klubet gjermane ato angleze?
Nuk duhet harruar se në Angli ka 5-6 ekipe në majë që kanë burime financiare të mëdha. Diferenca e madhe janë e drejta televizive. Bundesliga fiton aktualisht 220 milionë euro në tregun e huaj, Premier Liga 1.1 miliard. Edhe Spanja fiton gati 900 milionë, 4 herë më shumë se Bundesliga. Italia fiton gati dyfish më shumë se ne.
Çfarë është e nevojshme që klubet e Bundesligës të përmirësohen?
Të gjitha janë të nevojshme. DFL, edhe falë imazhit të Bundesligës, duhet të marketohet më mirë. Nuk është rastësi që anglezët kanë ecur përpara nesh prej disa kohësh.
Edhe në promovimin e talenteve të reja Anglia ka kaluar përpara. Si e shpjegoni këtë?
E kam parashikuar këtë vite më parë. Anglezët blejnë me logjikë tani. Kanë sjellë trajnerët më të mirë të botës, Pep Guardiolën dhe spanjollë të tjerë gjithashtu, që kanë prezantuar një tjetër kulturë futbolli. Është një tjetër stil futbolli nga ai "godit dhe vrapo". Dhe anglezët i edukojnë më mirë moshat nga 10-18 vjeç. Nuk është rastësi që kanë fituar çdo kampionat botëror moshash vitet e fundi me lojtarë si Sanço dhe Odoi. Në Gjermani, rëndësi i është vënë kolektivitetit, jo promovimit të individualiteteve. Ky ishte vendimi i gabuar i DFB-së. Është koha ta korrigjojmë shpejt.
Çfarë duhet të bëjë Bajerni që të afrojë në ekipin e parë një tjetër talent nga moshat?
Pa dyshim që vitet e fundit nuk kemi qenë të suksesshëm. Nuk është rastësi që talenti i fundit i ardhur nga akademia është David Alaba. Por, unë
shoh dritë në fund të tunelit.
Është koreani 19-vjeçar Jeong Woo-yeong një nga talentet më shpresëdhënës?
Ka pasur zhvillim të mirë, është punëtor, i sjellshëm dhe simpatik.
Por Bajerni do të vazhdojë të ketë nevojë për lojtarë të mëdhenj? Do ta blini Hames Rodrigezin?
Unë jam ende tifoz i tij. Ai ka një të majtë të pabesueshme dhe për mua është lojtar i klasit botëror. Nuk është rastësi që është një nga lojtarët më të ndjekur në rrjetet sociale bashkë me Mesin dhe Ronaldon. Jemi me fat që ndoqëm këshillën e Ançelotit. Trajnerët ndonjëherë kanë ide të mira dhe këtë e kemi konfirmuar edhe me Guardiolën dhe Tiagon. Duhet ta aktivizojmë klauzolën deri më 15 qershor. Ka ende mjaftueshëm kohë. Por, unë duhet ta them se të gjithë janë të lumtur me të. Kam idenë që Hames do të luajë te Bajerni edhe sezonin e ardhshëm.
Megjithatë, marrëdhënia mes Hamesit dhe trajnerit Kovaç nuk është më e mira?
Nuk mendoj se ata kanë një problem. Duhet thënë se ai ishte i dëmtuar në fazën e krizës sonë. Mendoj se tani Niko e shikon cilësinë e tij në të njëjtën mënyrë si pas ndeshjes ndaj Lajpcigut dhe është shumë i kënaqur me të.
Hënes tha së fundmi se Kovaç vetë do të vendosë për të ardhmen e Hamesit. Kështu është?
Ne kemi një komitet me Salihamixhiçin, Hënesin, trajnerin dhe mua për merkaton. Trajneri ka fjalën e tij, por jo atë ekskluzive.
Hënes ka paralajmëruar gjithashtu transferime të mbyllura në verë. E ka për Lukas Hernandezin e Atletikos?
Është një lojtar interesant, i cili do i përshtatej shumë profilit. Ai mbulon dy role, tek Atletiko luan qendërmbrojtës, ndërsa në kombëtare mbrojtësin e majtë. Është i ri dhe kampion bote. Këtu do gjejë disa francezë: Pavar, Toliso, Koman dhe ne kemi pasur gjithnjë eksperienca të mira me francezët, më kujtohen Sanjol, Lizarazu.
Besoni se Kovaç do bëjë epokë te Bajerni?
Është një trajner i ri dhe nuk ka përvojën e Hejnkesit, por jemi të kënaqur nga zhvillimi i tij.
Në 2021-shin ju skadon kontrata. Një triumf në Champions, në shtëpinë tuaj a do të ishte lamtumira perfekte?
Sigurisht që e dua ta fitoj edhe një herë deri atëherë. Deri tani, momenti më i rëndësishëm si drejtues është triumfi i 2013-ës, në "Wembley".
Dhe pastaj do pasoni Hënesin në presidencë. Por, në krye të FIFA-s, a mund t'ju shohim një ditë?
Jo, jo. Nuk janë role për mua presidenca e FIFA-s apo UEFA-s apo DFB. Atje je më shumë politikan, ndërsa unë dua të shijoj ndeshjet në stadium, të festoj për një gol, të shijoj një gotë verë të kuqe për fitoren në fund të ditës. Kjo do më mungonte brenda një zyre.