Gola dhe asiste, Mesi është lojtari më i mirë në Europë
Askush si “Pleshti” në 5 kampionatet kryesorë
Ndeshja ndaj Vajekanos ishte thjesht e radhës në karrierën e Leo Mesit. Nuk shërbeu për t’u mbajtur mend gjatë, por për të përmirësuar statistikat dhe shifrat e një tjetër sezoni spektakolar. Argjentinasi u largua nga “Kamp Nou” me një tjetër gol dhe me një tjetër asist, çka e bën atë liderin kryesor në këto statistika. Askush nuk shënon apo asiston aq sa Leo Mesi në ligat më të mëdha europiane. Ylli argjentinas e nisi përmbysjen ndaj Vajekanos me asistin për Pikenë, që shërbeu për barazimin e rezultatit. Leo hodhi një top në zonë dhe mbrojtësi kërceu mbi të gjithë duke baraspeshuar rezultatin. Në pjesën e dytë mori përgjegjësinë për të goditur penalltinë e fituar nga Semedo. Kaloi lehtësisht portierin Dimitrievski dhe shënoi golin e 52të nga 11-metërshi. E provoi edhe me mënyra të tjera, por nuk ia doli. Nuk kishte shumë rëndësi. Më e rëndësishmja ishte që Barcelona të merrte 3 pikët. Mesi shënoi dhe asistoi duke forcuar qëndrimin e tij në krye të tabelave që tregojnë golashënuesit dhe asistuesit në Europë. Në kampionat, argjentinasi ka shënuar 26 gola në 25 ndeshje të luajtura. Pas tij renditet Kilië Mbape, me 24 gola dhe 21 ndeshje dhe pastaj Kualjarela me 20 dhe Ronaldo e Piontek me 19. Në klasifikimin e asistuesve më të mirë, Leo konfirmohet sërish në krye. Me topin e pasuar për Pikenë janë 12 asiste në këtë sezon, një më shumë sesa Eden Hazard dhe 2 më shumë se Sanço i Dortmundit.
Në këtë sezon Barcelona duket në rrugën e duhur për titullin kampion në Spanjë, por objektivi madhor është fitorja e Ligës së Kampionëve. Me Mesin në formë të tillë, sigurisht që është e mundur.