Bylisi “fotokopje” në miqësore, thyen edhe Apoloninë
Lamçja abonohet me golin, Hysenshahaj humb penallti
Apolonia "thyhet" nga Bylisi në miqësore. Gentian Stojku e nis aventurën e tij me bardhejeshilët me një disfatë në shifrat 0-2. Miqtë kanë qenë dukshëm më superiorë, duke dëshmuar edhe një herë që jo më kot janë pretendentët kryesorë për t'u ngjitur në Kategorinë Superiore. Minutat e para kanë qenë të qeta, derisa skuadrat "nxehen". Mallakastriotët luanin ndeshjen e dytë brenda 48 orësh dhe ka paksa çedim fizik në fillim, ndërsa fierakët kërkojnë të prezantohen pozitivisht përpara trajnerit të ri. Rastet më flagrante do të vijnë në minutën e 23-të, me protagonist Mihanin. Ka mundësi që të shënojë dy herë radhazi, por nuk është i saktë në finalizim. Provon edhe Gjata me një gjuajtje të fortë ballore në hyrje të zonës, por Bytyçi grushton në këndore. Në minutën e 39-të zhbllokohet rezultati. Aksion i Bylisit nga e djathta e sulmit të tyre dhe Antoni gjuan saktë, duke dërguar topin në rrjetë. Në pjesën e dytë fierakët përpiqen të tregohen më shumë në fushë, ndërsa ballshiotët bëjnë një lojë më "aristokrate", nuk harxhojnë shumë energji dhe menaxhojnë mirë gjithçka. Hysenshahaj provon me një goditje dënimi nga rreth 20 metra, por topi kalon mbi traun e portës kundërshtare, ndërsa në minutën e 62-të, bardhejeshilët do të shpërdorojnë mundësinë më të mirë për të barazuar shifrat. Është një penallti e akorduar për Apoloninë, të cilën Hysenshahaj e gjuan jashtë. Edhe pas këtij momenti, janë vendësit që këmbëngulin më shumë dhe është Zoga që në të 74-ën minutë do të humbë një tjetër mundësi shënimi brenda zonës së Bylisit. Skuadra mike ka një rast flagrant goli, teksa Antoni del krejt i vetëm përballë Tozajt, gjuan fort nga dy metra distancë, por portieri i ri fierak ka bërë një ndërhyrje të pabesueshme dhe ka shmangur pësimin e golit të dytë, i cili do të vijë në minutën e 83-të. Guindo shpërthen nga e djathta e sulmit të tij, shmang 2-3 futbollistë fierakë dhe topi shkon në shtyllën e dytë, atje ku Lamçja "vulos" shifrat në 2-0. Duket se elbasanasi është "abonuar" me golin, pasi edhe një ditë më herët i shënoi Flamurtarit në Vlorë. E katërta miqësore që nga vera e këtij viti mes këtyre dy ekipeve, tri ndeshje janë fituar nga Bylis dhe vetëm 1 nga Apolonia.