Vllaznia s’bind, sulmuesi brazilian alarmon klubin
Shtubina shmang humbjen në miqësore, blerja e bujshme vuan nga një dëmtim i mbartur
Vllaznia nuk shkon më larg se barazi mi kundër Besëlidhjes. E fundit miqësore para startit të kampionatit ka përfunduar në shifrat 1-1. Kuqeblutë, ndryshe nga përballjet e tjera miqësore, dje nuk kanë bindur. Lezhjanët u shfaqën tejet kërkues dhe mund të fitonin pas avantazhit të arritur në të 63-ën me Abubakar Soumah, por mendoi Ndriçim Shtubina që të shpëtonte vendësit. Ai gol në të 92-ën minutë shmangu humbjen në "Loro Boriçi".
NDESHJA
Pjesa e parë ka qenë e gjitha për portierët. Pavarësisht një epërsie të lehtë territoriale të kuqebluve, mundësitë më të mira i kanë pasur miqtë. Që në të 3-ën minutë janë ata që rrezikojnë me Kamaranë, e megjithatë dy minuta më vonë u përgjigjet Shtubina. Por, mendon Bajri që të grushtojë mrekullisht. Loja është zhvilluar më shumë në mesin e fushës dhe në të 34-ën ishte radha e Sherrit që t'i thoshte "jo" golit pas gjuajtjes së Hoxhës. Në të 44-ën është kundërpërgjigjur me një grushtim spektakolar pas gjuajtjes së Krujës. Ne pjesën e dytë janë miqtë më dominues, të cilët pas insistimit të vazhdueshëm zhbllokojnë shifrat. Ishte e 64-ta minutë kur një gjuajtje nga jashtë zone e Soumah përfundon në rrjetë, pas një devijimi të lehtë të shkodranëve. Vllaznia tenton të barazojë me Likën, por edhe pse kalon portierin, mendon Sheta që të ndalë topin mbi vijën fatale. Në minutën e 75-të Hasaj vendoset përballë Sherrit, por në fund bën të pabesueshmen dhe e dërgon topin në "stratosferë". Bajri i bëhet makth Likës në të 82-ën, ndërsa Zogaj me Smajlin nuk kanë shënjestër. Kur koha e rregullt mbaroi dhe po mbyllej minuta e dytë shtesë, mendoi Shtubina që të sillte qetësi. Pas një harkimi nga e majta, mesfushori i adaptuar në sulmues gjuan me kokë dhe çon shifrat në 1-1. Duhet theksuar se lojtari i ardhur pak kohë më parë nga Laçi ishte ndër më të mirët në fushë, në një kohë që loja e Vllaznisë në tërësi la për të dëshiruar.
EMERSON
Vllaznia, në alarm për Emerson Brito Dos Santosin. Braziliani që u prezantua si blerje vetëm të premten, pa zhvilluar ende asnjë stërvitje, fut në stres stafin teknik. Ai është nisur drejt kryeqytetit për të kryer një ekzaminim në gju. Sigurisht që shumëkush mund të pyes: Kur u dëmtua, derisa nuk ka zhvilluar asnjë seancë me kuqeblutë...?! E megjithatë, lëndimi duket se është i mbartur. Në momentet që i janë kryer vizitat mjekësore, është konstatuar edhe shqetësimi i hershëm në gju. Kjo ka detyruar edhe klubin që ta dërgojë në Tiranë për kontrolle të mëtejshme. Të dhënat e para thonë që fillimin e kampionatit e humb, por shpresohet që të paktën dëmtimi të mos jetë më i rëndë dhe të qëndrojë më shumë larg fushave. Dhe nëse kjo ndodh, Jonuz do të bëhet me dhimbje koke. Emerson u prit me shumë interes, nisur edhe nga mungesat që ekipi kishte në repartin e sulmit. Por, duket disi e çuditshme që klubi nuk është kujtuar para se të firmoste, që duhet të kryheshin edhe vizitat mjekësore.