Nga Hoxha te Bardhi: Pas Superkupës duam titullin e dytë
Kapiteni, Mala dhe sulmuesi të lumtur pas fitores së trofeut
Partizani e mbylli sezonin e shkuar me një arritje historike ku nën drejtimin e trajnerit Skënder Gega rikthyen titullin kampion pas 26-viteve. Por edhe me trajnerin e ri, italianin Franko Lerda, të kuqtë e kanë nisur edicionin e ri në mënyrën e duhur duke fituar trofeun e parë sezonal, Superkupën e Shqipërisë, ku pas 120 minutash lojë mposhtën Kukësin me rezultatin 4-2. Në prononcimin e dhënë pas ndeshjes për mikrofonin e "RTSH"-së, kapiteni Alban Hoxha, Esat Mala dhe Jurgen Bardhi u dukën mirë me "oreksin", pasi menjëherë kërkuan që pas Superkupës të fitojnë titullin e dytë radhazi. Në vitet e fundit, ekipi që ka fituar Superkupën ka dështuar në kampionat, por protagonistët e kuq janë të bindur se do ta thyejnë edhe këtë tabu. ALBAN HOXHA
Për kapitenin Alban Hoxha, të fitosh trofe është ndjesi e bukur, ndaj pas ndeshjes ai pohoi se dëshiron të ngrejë sa më shumë kupa si portier i Partizanit. "Të fitosh trofe është ndjesi e bukur. Edhe vjet e nisëm me këmbën e mbarë. Ndoshta ishte një kupë pa vlera, kupa 'Pascucci', por kjo na rriti moralin dhe dëshirën për të ngritur sa më shumë kupa. Fituam kampionatin. Shpresoj që të jetë e njëjta gjë edhe këtë vit. Mendoj se ndikoi lodhja në pjesën e dytë. Gjatë lojës nuk po na dilnin as pasimet dhe u krijua një ngërç. Këto gjëra ndodhin në futboll, shpresoj sa më pak, por ishte mirë, sepse e rikuperuam shpejt. Ne duam të fitojmë kampionatin tani, ekipi është bërë për të fituar. Bëmë lojë të mirë. Edhe në Europë bëmë ndeshje të bukura. Me pak fat mund të kualifikoheshim", u shpreh kapiteni i të kuqve, Alban Hoxha pas fitimit të Superkupës. ESAT MALA
Kukësi i sjell fat Esat Malës, pasi edhe dje mesfushori arriti t'i shënojë duke i hapur rrugën fitores së Partizanit. Golin dhe trofeun Mala ia dedikoi familjes së tij. "E filluam aty ku e mbaruam, ishte me rëndësi që ta fitonim këtë Superkupë. Ishte një fillim i mbarë dhe më vjen mirë që e ndihmova ekipin me gol. Si gjithmonë, ia dedikoj familjes", u shpreh Esat Mala.
JURGEN BARDHI
Sulmuesi Jurgen Bardhi duket se e ka kaluar dëmtimin dhe tani ndihet gati për të kontribuuar dhe për të fituar edhe titullin e radhës me Partizanin. "U bë shumë kohë që nuk kam luajtur dhe ndihem krenar ta nis me trofe. Edhe vjet fituam një kupë dhe në fund e mbyllëm me titullin kampion. Shpresoj që edhe këtë vit", u shpreh Bardhi për "RTSH".