Duro: E dhuruam Superkupën, ja pse e kisha frikë shtesën
Trajneri i Kukësit: Rrocën e zëvendësova se nuk e justifikoi
Trajneri i Kukësit, Shpëtim Duro, ndien keqardhje për mënyrën se si shkoi loja e skuadrës së tij në ndeshjen e djeshme në "Elbasan Arena". Sipas Duros, Superkupën më shumë e dhuruan vetë sesa e meritoi Partizani. "Futbollin duhet ta menaxhosh deri në vërshëllimën e fundit, sepse ndodh ajo që ndodhi. Në pjesën e dytë dominuam, përmbysëm rezultatin dhe mund të shënonin sërish për ta çuar ndeshjen në 1-3. Më pas humbëm përqendrimin dhe kjo solli edhe disfatën", është shprehur fillimisht trajneri në bisedën për "RTSH" pas ndeshjes. Pse e zëvendësuat Rrocën në pjesën e dytë? Kishte probleme fizike apo diçka tjetër? Jo, nuk u dëmtua. Rroca nuk po e justifikonte me lojën dhe e zëvendësova. Ai ndryshim që u bë me rikthimin e Musollit në mesin e fushën, si dhe spostimin e Ethemit, mendoj se e ndryshoi ndeshjen. Ne e dominuam lojën dhe ndërrimi ishte pozitiv. Pakujdesia bëri që ta humbnim
ndeshjen. Në shtesë ekipi sikur u fik. Pse? Shikoni, edhe Gavazaj kërkoi zëvendësim dhe cilësia ra ndjeshëm. E kisha frikë ndeshjen në shtesë, sepse e ndieja që Partizani do të ishte më i favorizuar. Largimi i Gavazajt dhe Shkurtajt ndikoi shumë, sepse bëhet fjalë për dy lojtarë shumë cilësorë. Edhe Shkurtaj kishte probleme që në pushimin e pjesës së parë. Pastaj, goli i barazimit ishte jashtëzakonisht deciziv për mënyrën se si shkoi ndeshja. Këtë kupë e dhuruar vetë më shumë sesa e meritoi Partizani. Pse mendoni kështu?
E thashë, largimi i Gavazajt dhe Shkurtajt e ulën cilësinë. Gavazaj kërkoi ndërrim, sepse nuk është në 100%. Ishim pranë fitimit të trofeut, por nuk ishte e thënë. E kisha frikën në shtesë dhe ashtu ndodhi. Çfarë ndryshoi në pjesën e dytë dhe pse nuk besuat te aktivizimi i Bruno Lulajt që në fillim? Aktivizova Musollin për shkak të eksperiencës, më pas bëra lëvizjen me Lulajn. Për sa i përket Lulajt, mbrojtja ka qenë e improvizuar. Ethemi bëri një ndeshje jashtëzakonisht të mirë. Është lojtar që "shpon" vertikalisht. Për fat të keq, humbi një rast shumë të pastër. Si do të jetë Kukësi i këtij sezoni? Duhen lojtarë, presim këtë javë. Kjo lojë na bëri të mendojmë akoma më tepër për afrime, sidomos në repartin defensiv. Presim 2-3 lojtarë për të rregulluar diçka. Kukësi bëri shumë mirë në pjesën e dytë, por kemi probleme në mbrojtje, pasi, siç dihet, kanë ikur lojtarë shumë të rëndësishëm.