Nderim në vendlindje, përkujtohet Lefter Millo
Ishte 2 prilli i 1966-ës, kur në fshatin Dervician të Gjirokastrës lindi "meteori" me emrin Lefter Millo. Gjiganti i Luftëtarit, Partizanit, por edhe ekipit Kombëtar, falë klasit të tij në fushë, mbushi zemrat dhe bëri krenar çdo tifoz gjirokastrit. Por e pabesueshmja ndodhi më 7 mars 1997, kur një aksident fatal në periferi të Laricës i mori jetën në moshën 31-vjeçare. Ishte pikërisht kjo dita kur Millo u nda përfundimisht nga kjo jetë, por assesi nga futbolli. Ai bëri historinë, ndaj emri i tij nuk mund të harrohet. Dhe për të nderuar veprën që la pas, sot fusha e futbollit në fshatin Dervician mban emrin e tij. Dhe jo vetëm, pasi kohë më parë pranë kësaj fushe është vendosur edhe një bust i ish-futbollistit të Luftëtarit, Partizanit dhe Kombëtares shqiptare. Florentina (Dina), motra e legjendës, e cila në librin me titull "Dropulli im që ta kam zili", mes lotëve kujton: "Për zemrën që m'u nda në dy pjesë, çfarë t'ju them? Më kujtohet kur nisej nga fshati në Gjirokastër për të qenë në orarin e duhur në stërvitje. Për Lefterin çdo thënie është e tepërt. Jeta nuk të kursen. Vëllai im është i gjallë në zemrat e dropullitëve dhe gjithë shqiptarëve. Fjalët më mungojnë, lotët më pushtojnë. Ju faleminderit që respektoni jo vëllain tonë, por njeriun model, fjalëpak e punëshumë në fushën e lojës dhe kudo".
- Dhe për të përkujtuar Lefter Millon, mbrëmjen e së shtunës u zhvillua një aktivitet në Dervician. Pjesë e axhendës ishte edhe një miqësore mes Luftëtarit (formacioni i dytë) dhe Këlcyrës. Kryetari i Bashkisë së Dropullit, Dhimitër Dilo, në respekt të legjendës ia dhuroi trofeun kapitenit të ekipit fitues në atë ndeshje, Alvi Ahmetajt. Emocionet dhe lotët ishin bashkudhëtarë në atë ceremoni. Në fund u ndanë në mënyrë simbolike edhe bluza me emrin e të madhit Lefter Millo. Prefekti i Gjirokastrës, Astrit Aliaj, kryetari i Bashkisë së Dropullit, Dhimtër Toli dhe ai i Bashkisë Gjirokastër, Flamur Golemi, i dhuruan motrës së Lefterit edhe bluzat që i madhi Millo veshi në karrierën e gjatë sportive, ato të Luftëtarit, Partizanit dhe përfaqësueses kuqezi. Ceremonia në nder të Millos, që numëron 20 ndeshje në 10 vjet me Kombëtaren, u shoqërua me këngën e Hysni Zelës për të vijuar me grupin e Kalivaçit të Tepelenës, dirigjuar nga vlonjati Tomor Lelo.