Luftëtari, pranë ish-fantazistit të Olimpiakosit dhe Karabakut
Kumbinjo drejt firmës me bluzinjtë, ka qenë shok ekipi me Agollin
Luftëtari pritet të jetë shumë aktiv gjatë kësaj jave në merkato, teksa përkon edhe me startin e kampionatit. Bluzinjtë e nisin me një transfertë "bombë" si ajo e Tiranës, ndërsa më pas kalendari u rezervon ndeshjen në shtëpi ndaj kampionëve në fuqi të Partizanit. Një kalendar shumë i pafavorshëm për bluzinjtë, të cilët kanë vetëm 21 ditë që kanë nisur stërvitjen dhe tashmë futen në javën e përgatitjeve të ndeshjes me bardheblutë më 24 gusht në "Selman Stërmasi". Sot ose nesër pritet që skuadrës t'i bashkohet afrimi më i ri, mbrojtësi 26-vjeçar grek Mavrudis Bugaidis. Ndërkohë, "Panorama Sport" mëson nga burime të sigurta në klub se afrimi më i bujshëm pritet të jetë ai i fantazistit brazilianin Marinaldo Kikero da Silva, i cili njihet me nofkën Kumbinjo. Ish-lojtari i Olimpiakosit dhe shumë skuadrave të tjera greke ka mbyllur sezonin në Brazil dhe prej dy javësh është në negociata me drejtuesit e Luftëtarit. Mësohet se palët kanë arritur në parim një marrëveshje dhe në ditët e ardhshme do të zyrtarizohet gjithçka. Pak ditë më parë ishte vetë presidenti i bluzinjve, Bekim Halilaj, që paralajmëroi për "Panorama Sport" ardhjen e një numri 10, por pa përmendur emrin për shkak të bisedimeve të pambyllura. Tashmë gazeta mëson e bëhet fjalë pikërisht për Kumbinjon, një 32-vjeçar që njihet më shumë në Greqi dhe Azerbajxhan, por që ka CV shumë të pasur. Fantazisti ka luajtur 165 ndeshje në Superligën greke me skuadra si Levadhiakos, Atromitos, Ethnikos Pireus, OFI dhe Panseraikos. Ndërsa ka qenë shok skuadre për tri sezone me ish-kapitenin e Kombëtares shqiptare, Ansi Agolli, te Karabaku. Ai ka fituar dy herë
titullin kampion në Azerbajxhan, duke qenë pjesë e rëndësishme e Karabakut. Afrimi i tij do të plotësonte fazën sulmuese të bluzinjve, pasi është afruar së fundmi edhe lojtari i krahut, Andi Renja, që gjithashtu vjen pas një eksperience në Greqi me Arisin,
si dhe kohët e fundit në Bullgari. Ndërkohë, deri më tani Luftëtari ka zyrtarizuar si afrime në merkaton e verës edhe portierin grek, Panajotis Paiteris, si dhe disa lojtarë të rinj që vijnë nga Partizani dhe njihen mirë nga trajneri Dalipi.