Boks, Beqiri do triumfin e tretë si profesionist
"Synoj majat, shpresoj që një ditë të bëhem kampion bote"
Alban Beqiri është ndër boksierët më të suksesshëm shqiptar, ku së fundmi ka arritur të debutojë e të shkëlqejë edhe në boksin profesionist, duke regjistruar 2 triumfe në po kaq ndeshje. Ai e ka filluar karrierën e tij në moshën 13-vjeçare dhe ka arritur të shpallet kampion kombëtar për 8 vite radhazi, ndërkohë që është zgjedhur gjithashtu për 4 vite si boksieri më i mirë në Shqipëri. 3 herë, gjithashtu, ka arritur të shpallet kampion në turneun ballkanik si dhe fitues i shumë medaljeve të tjera në evente të ndryshme ndërkombëtare. Beqiri, gjithashtu, ka marrë pjesë edhe në dy edicione të Lojërave Olimpike Europiane, duke zhvilluar paraqitje mjaft të mira, ku së fundmi ishte ndër sportistët shqiptarë më të mirë në "Minsk 2019". 25-vjeçari nga Puka, i cili aktualisht do të duelojë në peshat 70 kg, në një intervistë për "Panorama Sport" rrëfen përgatitjet që po bën për ndeshjen e radhës, e cila do të jetë pas një muaji: "Dueli im i radhës është më 21 shtator në Shkodër. Do të jetë ndaj një boksieri të huaj, por që ende
nuk është zyrtarizuar emri i tij. Tani po vazhdoj fazën përgatitore në Voskopojë, duke u stërvitur intensivisht e më pas do të kthehem në Tiranë për t'i vijuar aty përgatitjet me të njëjtin ritëm". Më pas kampioni i boksit tregon edhe objektivat që i ka vënë vetes, ku synon që të ngjitet në majë e një ditë të shpallet edhe kampion bote. "Objektivi im i afërt është të fitoj ndeshjet e radhës që do të kem këtu në Shqipëri apo edhe në eventet ndërkombëtare ku do të jem i pranishëm, ndërsa në të ardhmen ajo që synoj, është që të shpallem kampion bote", shprehet Beqiri. Por të bësh boks në Shqipëri nuk është e lehtë, gjë që 25-vjeçari e di mjaft mirë: "Në vendin tonë sigurisht që ka vështirësi të shumta, pasi mungojnë kushtet. Por jemi mësuar dhe me shumë sakrifica duhet të përshtatemi me situatën që kemi dhe patjetër, duke dhënë maksimumin për të arritur majat në këtë sport. Dua të falënderoj trajnerin tim Sead Bushatin, pasi sukseset e mia janë edhe falë punës dhe ndihmesës së jashtëzakonshme që më ka dhënë". Në fund Alban Beqiri tregon se cilët janë boksierët e tij të preferuar nga të cilët frymëzohet: "Dy boksierët që unë pëlqej janë filipinasi Pakuaio dhe kazakistanasi Genadi Golovkin. Janë dy kampionë shumë të përkushtuar ndaj boksit dhe me stërvitje kanë arritur gjithçka, duke qenë të padiskutueshëm në ringun botëror", përfundon Alban Beqiri.