Faza përgatitore e Donarumës, porta është garancia e vetme
Gardiani vijon të dhurojë paraqitje fantastike
Hapi prapa i Milanit ndaj Çezenës nuk e prek. Edhe në paraqitjen gri të së shtunës, kuqezinjtë kanë lajme pozitive për sa i përket portës. Gjithçka lidhet me Xhanluixhi Donarumën, i cili në daljet parasezonale të "Djallit" ka qenë një konstante me vlera të larta. Pritjet në SHBA kundër Benfikës ishin sinjalet e para, teksa edhe ndaj Mançesterit në Kardif Xhixho shkëlqeu në kuadrat. Edhe ndaj Çezenës rezultoi vendimtar teksa në minutat e fundit i mohoi golin Butiçit që goditi nga fare pranë. Edhe pse në miqësoret e verës rezultati nuk ka fort rëndësi, një humbje e Milanit në "Manuci" do të kishte shtuar problemet për Marko Xhampaolon. Pikërisht skuadra e këtij të fundit udhëton të dielën drejt Udinezes dhe nëse qetësia e grupit nuk është lëkundur, meritat i takojnë numrit 99, sepse Xhixho vijon të jetë një garanci. Gjithmonë nëse merkatoja nuk e shkëput nga Milani. LEONARDO, MIKU-ARMIK - Mundësia e largimit të Xhixhos vijon të jetë konkrete, sepse PSG-ja nuk ka hequr dorë nga ideja për të blerë një portier. Leonardo, drejtori i parisienëve e njeh mirë Donarumën dhe mund të tentojë goditjen përpara 2 shtatorit (afati i përfundimit të
merkatos). Homologët, njëkohësisht edhe miqtë e tij, Maldini e Boban, mund të "sakrifikojnë" portierin në rast se në "Casa Milan" mbërrin një ofertë që i tejkalon 50 milionë eurot. Kjo shumë do të ishte e gjitha fitim i pastër dhe do t'ua rriste lirinë kuqezinjve në merkato. Italianët qëndrojnë në pritje, jo sepse PSG-së nuk i duhet të shesë fillimisht Nejmarin për të siguruar likuiditet për blerjen e Xhixhos, por sepse i duhet gjetur një klub Areolas. Portieri aktual i francezëve ka të njëjtin menaxher të Donarumës, ndaj Mino Raiola nuk do të ndërmjetësojë pozitivisht për të vlerësuar një
lojtar të tijin në kurriz të një të asistuari tjetër. Kjo është edhe arsyeja pse në orvatjen e parë për të blerë Donarumën, Leonardo kërkoi të përfshinte Areolan në marrëveshje.
MENDJA NË FUSHË - Në gjithë këtë amulli, Donaruma ka treguar profesionalizëm duke punuar mirë dhe fort për sezonin e ri. Përqendrim dhe formë fizike optimale pavarësisht se sezoni nuk ka nisur ende zyrtarisht. Siç thamë, 2 shtatori do të japë vendimet e fundit, por Xhixho duket që është gati, kudo që të jetë vazhdimi i karrierës së tij. Paris apo Milano? Do ta marrim vesh së shpejti.