Mou, në lot: Futbolli më mungon
Zhoze Murinjo nuk ka arritur të përmbahet. Janë bërë saktësisht tetë muaj nga momenti i largimit nga posti i trajnerit të Mançester Junajtidit, kur u shkarkua pas ndeshjes kundër Liverpulit, ku u mposhtën 3-1 me dy golat e shënuar në atë takim nga Xherdan Shaqiri. Që nga dhjetori i vitit të kaluar "Speciali" është i papunë, pas aventurës së fundit me "djajtë e kuq", edhe pse ofertat për të nuk kanë munguar dhe aktualisht ka nisur një eksperiencë të re si prezantues dhe opinionist televiziv për televizionin britanik "BT Sport". Një zgjedhje për të cilën ndoshta sot disi pendohet, sepse pyetjes se sa i mungon kontakti me tapetin e gjelbër, nuk ka qenë në gjendje t'i përgjigjet me gjakftohtësi si gjithmonë, por i ka shpëtuar më shumë se një pikë loti. Gjatë një interviste për mediat italiane nuk ka mundur të fshehë trishtimin për distancën nga fusha.
- Mou e pranon që po i mungon adrenalina që i jep futbolli dhe ka zbuluar se është ende duke e mësuar gjuhën gjermane. "Më mungon futbolli, adrenalina që të jep fusha. Futbolli është futboll, - ka thënë 58-vjeçari, duke shpërthyer në lot. - Për momentin jam duke mësuar gjuhën gjermane. Unë nuk e kam ditur këtë gjuhë. Flas anglisht, spanjisht, frëngjisht dhe italisht". Detyra e parë e portugezit si trajner ka qenë te Benfika në vitin 2000, pasi kishte punuar më parë si përkthyes dhe trajner te Barcelona: "Fillimisht argëtohesha, më pas u shndërrua në zanat. Kështu ka qenë deri tani, që jam ndalur, në vend që të pushoj më mungon", ka përfunduar Murinjo.