Dibala mbetet në merkato, menaxherët drejt Parisit
Nuk mjafton perla ndaj Triestinës, argjentinasi drejt largimit
Goli i shkëlqyer kundër Triestinës dhe festa krenare, duke treguar fanellën dhe jo më maskën e tij tradicionale, nuk mjaftuan për të shkruar fjalën "fund" mbi telenovelën e merkatos që ka lidhje me Paulo Dibalën. Pozicioni i argjentinasit, sot për sot, nuk ka ndryshuar: Juventusi e konsideron gjithnjë një futbollist në merkato dhe destinacioni më i mundshëm në këtë pikë është Parisi. Sipas "Sportmediaset", menaxherët e numrit 10 të bardhezinjve do të jenë në kryeqytetin francez ditën e nesërme për të negociuar transferimin e tij te kampionët e PSG-së. Pavarësisht nga situata e Nejmarit, e cila duket e përcaktuar (drejtori sportiv Leonardo i ka kërkuar Realit të Madridit një shifër cash pranë 100 milionë eurove plus kartonin e Rafael Varanit dhe Vinisius Zhuniorit, duke marrë përgjigje negative nga madrilenët), klubi i emirit të Katarit ka vendosur për t'i bërë serioze bisedimet për juventinin, mbi të gjitha pas transferimit të Kutinjos drejt Bajernit të Mynihut. Dhe PSG, ndryshe nga sa ndodhi me
Mançester Junajtidin (gjeti akordin me kampionët e Italisë, por futbollisti refuzoi, duke kërkuar një rrogë të çmendur në "Old Trafford"), është një zgjidhje e pranueshme nga ana e Dibalës. Shumë më tepër sesa është Interi, që në hipotezën e një shkëmbimi me
Mauro Ikardin, do të merret në konsideratë vetëm në rast se do të mbërrihet në ditët e fundit të merkatos, pa arritur asnjë marrëveshje në fronte të tjera. Nga të gjitha palët ekziston vullneti, që në këtë pikë të ketë një mbyllje sa më të shpejtë të bisedimeve, në mënyrë që
gjithçka të jetë zgjidhur përpara orëve të para të shtatorit. Interi nuk heq dorë në fakt, por në dalje nga Torinoja duken edhe emrat e Manxukiçit dhe Higuainit. Dhe surpriza e përfolur që mund të mbërrijë do të ishte Dembele, sulmuesi i Lionit.