Fitore dhe festë, Sharl Lëklerk ngre në “ajër” Monzan
Botas dhe Hamilton plotësojnë podiumin, Fetel e katranos
Sharl Lëklerk triumfon në Çmimin e Madh të Italisë në Formulën 1, duke e ringjitur pas 9 vitesh Ferrarin në shkallën më të lartë të podiumit në Monza. 21vjeçari nga Montekarloja ia doli të merrte fitoren pas një gare mjaft të lodhshme, në të cilën duhej t'u bënte ballë sulmeve të ashpra të pilotëve të Mercedesit, Botas e Hamilton, të cilët plotësuan podiumin, duke u renditur përkatësisht në vendin e dytë dhe të tretë. Ndërkohë, gara e djeshme ishte krejtësisht për t'u harruar për Sebastian Fetelin. Gjermani i Ferrarit e katranosi që në fillim duke u penalizuar për t'u renditur në fund në vendin e 13-të. Kështu, agjërimi merr fund dhe pasi i dha "kokëkuqes" një javë më parë suksesin e parë sezonal në Spa, Lëklerk i bën dhuratën më të bukur skuadrës nga Maraneloja, duke fituar garën më të rëndësishme, atë të shtëpisë. Një triumf që Ferrarit i mungonte që prej vitit 2010, kur e arrinte Fernando Alonso. Këtë sukses djaloshi nga Montekarloja e merr pas një beteje për infarkt, fillimisht me Hamiltonin e më pas me Botasin, duke mbërritur në finish me gomat më të freskëta se të dy rivalët. Ashtu sikurse në Belgjikë, Lëklerk u tregua fenomenal, duke i rezistuar presionit të madh, ndonëse nuk munguan as gabimet (disa ndëshkime me të verdhë nga komisarët), të cilat i ngrinë zemrën tifozërisë së kuqe. Megjithatë, në fund të gjithë shpërthyen në festë, ndonëse piloti tjetër, Sebastian
Fetel, bëri një garë për t'u harruar. Gjermani përfundoi jashtë piste në tentativën e tij për të sulmuar makinat Mercedes. Në rifutjen në asfalt, ai godet makinën Racing Point të kanadezit Stroll. Një manovër shumë e rrezikshme që i kushton 4 herë kampionit të botës
një penalizim të paevitueshëm prej 10 sekondash. Rezultati përfundimtar për Fetelin është vendi i 13-të, që dhemb si për të ashtu edhe për tifozët e skuderisë italiane. Ky ishte zhgënjimi i radhës për gjermanin, që vazhdon të jetë hija e vetvetes. Ndërkohë, vijon të buzëqeshë Luis Hamilton, i cili i drejtohet një triumfi të sigurt në botëror, ndonëse në Itali ndoqi një strategji të gabuar, që favorizoi kolegun Botas në rikuperimin e 4 pikëve ndaj tij. Britaniku regjistroi edhe xhiron më të shpejtë, duke marrë edhe 1 pikë bonus. Gara e djeshme ishte e shkëlqyer edhe për pilotët e Renosë, ku Riçardo u rendit i katërti ndërsa Hulkenberg i pesti. Ndërkohë, Maks Vershtapen, i cili u nis nga vendi i fundit për shkak të ndryshimeve në motor, rikuperoi disa pozicione, duke e mbyllur garën në vendin e tetë.