Skandali me himnin, arbitri: Ju tregoj kur befasuam danezët
Flet Bardhyl Pashaj: Historia me Kastriot Tushën në Shqipëri-Danimarkë
Bardhyl Pashaj ishte një emër i njohur i arbitrimit në Shqipëri deri tri vite më parë, kur edhe vendosi të emigronte në Amerikë. Ish-gjyqtari ndërkombëtar, ashtu si çdo shqiptar, ka mbetur i befasuar nga ajo që ndodhi para ndeshjes me Francë, ku në vend që të ekzekutohej himni i Shqipërisë, u vendos ai i Andorrës e më pas gafa vazhdoi me spikerin që kërkoi falje për... Armeninë. Dje ish-arbitri i FIFA-s ka treguar një histori me çështjen e himnit, pikërisht në ndeshjen ShqipëriDanimarkë, 1-1, luajtur më 11 tetor 2014 në stadiumin "Elbasan Arena".
HISTORIA - "Më ka qëlluar shpeshherë që për shkak të punës si arbitër ndërkombëtar, të shoqëroja delegacionet e arbitrave të huaj, por edhe të skuadrave të shteteve të ndryshme. Këtë punë e bëja me shumë dëshirë, sepse kjo punë vullnetare më jepte mundësinë të njihja njerëz të shquar të futbollit ndërkombëtar nga UEFA dhe FIFA, ku mund të mësoje shumë se si organizohej një ndeshje ndërkombëtare. Po ju sjell një histori me himnin nga ndeshja Shqipëri-Danimarkë përpara 4 vitesh në Elbasan. Unë shoqëroja delegacionin e Danimarkës, më konkretisht përgjegjësin e skuadrës. Ai ishte një burrë rreth 60 vjeç, njeri shumë i shkathët dhe i komunikueshëm, me një eksperiencë të gjatë në federatë. Ai pyeste për çdo detaj, nuk pushonte së foluri në telefon me menaxheren e hotelit ku ishte akomoduar skuadra, por edhe
me delegatin e ndeshjes dhe stafin e tij. Çdo gjë ishte e planifikuar në detaje. Por, le t'i kthehemi himnit. Pak çaste para se të fillonte ndeshja, përgjegjësi i delegacionit me CD-në e himnit në dorë më kërkoi të takonim personin përkatës, i cili do të transmetonte himnin e dy vendeve. I them përgjegjësit tonë, Lysienit (aktualisht shef i sektorit të garave në FSHF) dhe ai më tregoi se himnet e dy vendeve do të këndohen 'live' nga tenori Kastriot Tusha. Menjëherë ia thashë përgjegjësit të Danimarkës, i cili nuk e pëlqeu këtë ide. Ai më tha se himni danez është shumë i vështirë për t'u
kënduar nga vetë danezët, e jo më nga një shqiptar. Megjithatë, më tha: 'Unë dua ta dëgjoj një herë vetë, pastaj do të vendosim'. E gjeta Kastriot Tushën diku në pistën e stadiumit dhe i them se shefi i Danimarkës do të dëgjojë himnin përpara se ta këndosh zyrtarisht. Kastrioti, me një nënqeshje, pranoi me shumë xhentilesë. U takuam të tre në një qoshe korridori, unë, shefi i Danimarkës dhe Kastriot Tusha. Pasi u prezantua, Kastrioti filloi të këndonte, ndërsa përgjegjësi i Danimarkës shqeu sytë dhe u befasua nga interpretimi i tenorit tonë. 'Mos vazhdo më, mjafton. Ti qenke
i mrekullueshëm', i tha ai. Pas aprovimit të tij, himni i Danimarkës u këndua 'live' në stadiumin e Elbasanit. E përmenda këtë histori, sepse si për çdo punë, duhet që të gjendet dhe mbahet përgjegjësia për gabimin që ndodhi në Francë. UEFA, pa bashkëpunimin e dy federatave përkatëse, e ka të pamundur t'ia dalë dhe mund të dështojë. Prandaj, e pakta, duhet sqaruar pse ndodhi kjo ngatërresë e transmetimit të himnit dhe personat përkatës duhet të marrin përgjegjësitë që të mos ndodhin këto situata sa qesharake, por edhe të turpshme", përfundon ish-arbitri shqiptar i FIFA-s.