Gjika: Veting për çdo blerës
“Verifikimi duhet të jetë kusht për biznesin apo kompaninë që do të marrë klubin”
Koha e replikave dhe polemikave ka mbaruar. Shpëtim Gjika dhe Sinan Idrizi kanë vendosur të bëjnë “paqe”. Ishpresidenti më jetëgjatë i Flamurtarit dhe administratori aktual i klubit kohë më parë ishin të ashpër me akuza dhe kundërakuza, ndërsa tani duket se po fryn një “erë” tjetër në marrëdhëniet mes tyre. Kanë vendosur të mos bëjnë më debat në distancë, por duke dhënë... sugjerime. I kontaktuar nga “Panorama Sport”, ish-kryebashkiaku i Vlorës ka theksuar se duhet bërë veting, por e sheh të udhës që të saktësojë se nuk e ka për individët, por për kompaninë që do ta marrë klubin pas privatizimit. “Jam i mendimit se duhet veting. Vetingu është justifikimi i burimit të të ardhurave. Mund të më kenë keqkuptuar në mendimet që kam dhënë. Jo veting për Sinanin, si individ. Po i referohem administratorit të Flamurtarit, pasi bëjmë fjalë për këtë klub. Në veting duhet të kalojë biznesi dhe ky duhet që të jetë një kusht për këdo që do të marrë drejtimin e klubit”, sqaroi ish-kryebashkiaku për gazetën. Sipas Gjikës, e vetmja zgjidhje për të shpëtuar Flamurtarin mbetet privatizimi. Ndërsa vijon t’i mëshojë faktit se biznesi që do ta privatizojë klubin, duhet të ngrijë në bankë një garanci financiare. “Privatizimi është zgjidhja për Flamurtarin dhe futbollin në përgjithësi. Që të mos ketë probleme me financimin, duhet që biznesi të ngrijë në bankë fondin e deklaruar në kontrata”, përfundoi ish-presidenti.
PROPOZIMET - Kujtojmë
se pak ditë më parë në “Facebook”, Shpëtim Gjika jepte recetën se si Flamurtari mund të dilte nga kriza: “Ligji i ri nuk ofron asgjë për privatizimin. E them me bindje ekonomike dhe juridike. Privatizimi sot për sot më shumë më duket si një sebep
për të justifikuar situatën sesa zgjidhje. Lehtësirat fiskale për këdo që investon në sport, si dhe ‘amnistia’ për detyrimet tatimore po, këto i shoh si një lloj zgjidhjeje, por edhe këto të dyja më shumë i shoh si ‘qoka’ për investitorët e sponsorët sesa si shpëtim për klubin”.