Marantas zbarkon në Gjirokastër: Bashkë do ta nisim mirë
LUFTËTARI/ Trajneri nis punën me fjalim e këshilla
Jorgos Marantas merr zyrtarisht “frenat” e Luftëtarit. Duke shmangur daljen para mediave, trajneri e ka parë të udhës që këtë rrugëtim ta nisë me një prezantim të thjeshtë para lojtarëve. Fjalimi - Ai ka mbledhur dje në Dervician ekipin dhe para se të kryente të parën seancë stërvitore, ka menduar që të mbajë një fjalim. Në praninë e drejtorit sportiv Artur Dadaj, greku është shfaqur tejet konkret para 26 lojtarëve, duke radhitur disa kërkesa dhe këshilla. “Dëshiroj që bashkë të kemi bashkëpunim të mirë dhe jam i bindur se kështu do të ndodhë. Jeni lojtarë të rinj, keni mundësinë dhe kohën e mjaftueshme për të bërë karrierë, kur të vishni fanellën e Luftëtarit. Duhet të respektoni këtë fanellë (me dorën e djathtë u tregon lojtarëve stemën e skuadrës. Të tregoni etikë brenda dhe jashtë fushe. Të jeni profesionist. Kuptohet që futbolli ka dhe gabime, por ju duhet të keni bashkëpunim të mirë dhe korrekt me njëri-tjetrin. Jeni bashkëlojtarë, ndaj duhet të keni harmoni. Në lojë e sipër nuk duhet të ketë vend për diskutime se kush gaboi më shumë apo më pak. Duhet ruajtur përqendrimi dhe serioziteti”, mësohet t’u ketë thënë ndër të tjera 46-vjeçari lojtarëve para seancës së djeshme.
STËRVITJA - Pas përfundimit të prezantimit Marantas me titullarët e ndeshjes së fundit realizoi vrapime për 7 minuta, ndërsa ndihmësi i tij, Novi, me grupin tjetër zhvilloi nxemjen e zakonshme të shtrirë në harkun e 20 minutave. Koha në dispozicion e planifikuar për 60 minuta nga tekniku u shoqërua me lojë. Titullarët nën urdhrat e grekut janë ndalur disa herë për të kryer në perfeksion atë çka u kërkohej. Qarkullim të topit lojë me pasime dhe mbulim të rolit u ka kërkuar të tijve Marantas. Sakaq, Novi në gjysmëfushë, me pjesën tjetër të grupit, të ndarë me nga
katër lojtarë, insistonte në lojën agresive dhe të shpejtë. I vetmi lojtar që mungonte në seancën e djeshme, ishte Aurel Demo. Sipas stafit mjekësor të Luftëtarit, mbrojtësi sot do t’i bashkohet grupit, por më parë duhet parë ecuria e mjekimit javën e lënë pas. Tomor Shehu