Kasemiro i paprekshëm, Brazili i jep “gradat”
Rëndësia e Kasemiros te Reali i Madridit është e jashtëzakonshme. Që nga rikthimi i tij në formacionin e "galaktikëve", roli i mesfushorit brazilian është rritur nga viti në vit. U shndërrua në një titullar të paprekshëm të aventurës së parë të Zidanit në stolin e Realit. Në atë kohë ishte një surprizë interesante, ndërsa tani është lojtari i vetëm që e ka vendin e sigurt në formacion. Zidan nuk ka një tjetër Kasemiro në skuadër dhe mungesa e tij do të jetë dhimbje koke për trajnerin francez.
FRIKË NGA DËMTIMI- Trajneri dhe klubi as nuk duan ta imagjinojnë një ndalesë të brazilianit, i cili do ta linte skuadrën pa një element të rëndësishëm në skemën e Zidanit dhe do t'ia bënte jetën e vështirë në gjetjen e zëvendësuesit. Braziliani nuk është i paprekshëm për kualitetin që ka, por edhe sepse nuk ka një zëvendësues ideal në ekip. Pogba do të ishte një lojtar që do të jepte shumë garanci dhe kjo ishte një nga arsyet pse Zidan e kërkoi me çdo kusht. Ai e donte kampionin e botës edhe për faktin që bën disa role të tjera në repartin e mesfushës. Pogba mund të ishte titullar në çdo pozicion ku luan Kasemiro, Kros dhe Modriç. Por francezi ishte mision i pamundur dhe Kasemiro është "mbreti" në rolin e tij.
Mesfushori nuk është i rëndësishëm vetëm për Realin e Madridit, por edhe për kombëtaren e tij të Brazilit. Ai është një pikë referimi për trajnerin Tite dhe sa herë mungon, "Seleçao" ka probleme. Lajmet nga Brazili bëjnë me dije se trajneri i verdhejeshilëve është duke menduar seriozisht që t'i japë shiritin e kapitenit dhe ta gradojë atë përgjithmonë në kombëtare. Dani Alvesh është në fundin e karrierës dhe Kasemiro do të ishte i duhuri si pasardhësi i legjendës braziliane.