Dëmtime dhe ankth, Lëv “dridhet” në Irlandë
Trajneri e pranon: Jemi nën presion, por duam fitoren
Katër shuplakat e marra kundër Holandës në Hamburg duket se kanë lënë një gjurmë të fortë në radhët e kombëtares së Gjermanisë, e cila sikur të mos mjaftonte ankthi i rezultatit të detyrueshëm, në sfidën e sotme në Belfast vazhdon të goditet nga mallkimi i dëmtimeve. Nëse përpara Holandës trajneri Joakim Lëv kishte humbur mesfushorin e Bajernit të Mynihut Leon Gorecka, dje janë konfirmuar edhe dy mungesa të radhës: anësori i majtë Niko Shulc dhe mesfushori Ilkai Gyndoan janë dëmtuar në stërvitjen e fundit dhe nuk do të jenë në dispozicion për eliminatoren kundër Irlandës së Veriut. Dy probleme të tilla u prishin jo pak plane 4 herë kampionëve të botës.
DËMTIMET - Duke e nisur me mungesat e regjistruara në orët e fundit, Joakim Lëv nuk kërkon asnjë alibi: "Nuk është një moment i lumtur për ne, sepse kur humb tre lojtarë brenda tri ditësh, nuk është e lehtë. Në fillim Gorecka dhe tashmë Gyndoan e Shulc bëjnë që planet e përpiluara në stërvitje të hidhen në erë, ndonëse nuk vuajmë për alternativa. Thjesht do kisha dashur që grupi të ishte i plotë përpara Irlandës së Veriut, pasi çdo futbollist ka cilësi specifike dhe në varësi të ndeshjes mund të të hyjnë në punë. Gjithsesi, do të jemi gati, shprehet trajneri i Gjermanisë, i cili zbulon edhe favoritët për të zëvendësuar dy të dëmtuarit. Në vend të Shulcit mund të lua
jë një mes Halstenberg ose Hektor, i cili e njeh shumë mirë grupin dhe idetë e lojës që unë kërkoj. Ndërsa në mesfushë ka shumë mundësi që të ketë një shans për Kai Havertc nga minuta e parë. Po flasim për një lojtar shumë të talentuar, i cili e ka merituar që të jetë pjesë e këtij grupi. Nojer titullar? Po, Manuel është titullari im absolut dhe kjo nuk diskutohet".
ANKTH "HOLANDEZ"
Lidhur me kundërshtarin, Joakim Lëv nuk pret një Irlandë të Veriut me format sulmues, si në ndeshjet e kaluara: "Ndryshe nga katër ndeshjet e fituara në grup, këtë herë pres një Irlandë më mbrojtëse. Ata luajnë me dy sulmues zone, ndaj ne duhet thjesht që të tregohemi të kujdesshëm në qendër të mbrojtjes. Kritikat e marra për prapavijën tonë pas Holandës ishin të merituara dhe e pranoj gjithashtu se brenda grupit kam parë shumë ankth, shumë presion. Por unë shpresoj që lojtarët e mi thjesht të zbresin në fushë të bindur mbi cilësitë e tyre dhe të luajnë të qetë. Thjesht fakti që do të përballen me ne do ta detyrojë Irlandën e Veriut që të luajë në mbrojtje, ndërsa ne duhet të luajmë me zgjuarsi dhe ta harrojmë humbjen me Holandën".