Konte bën 100 ditë, ja ndryshimet tek Interi
Bilanci i parë pas 3 muajsh, menjëherë në krye të Serisë A
Presidentët amerikanë e kanë zakon fes timin e përvjetorit me fjalimin e parë zyrtar pas atij të emërimit. 100 ditët e para, nga kohët e Frenklin Ruzveltit, janë si një skadencë pas të cilës skicohet një bilanc, kuptohet fryma e ambientit, theksohen se sa premtime elektorale kanë nisur të marrin formë. Dhe, qeveria “Konte” i ka festuar pikërisht ditën e djeshme. Pasi mori drejtimin e Interit më 31 maj, “udhëheqësi” zikaltër gjatë këtyre tre muajve ka ditur të vendosë rregull, dhe jo vetëm atë. Besimi dhe kënaqësia e tifozëve mbetet e lartë, skuadra është më në fund e plotë, ligjet më të diskutuara nga paraardhësit janë shfuqizuar, llogaritë e para rezultative janë pozitive (6 pikë nga 6) dhe janë hedhur themelet për të përballuar çështjet më të rëndësishme në tavolinë.
“DEKRETET” E PARA Objektivi i parë ishte arritur që me fushatën zgjedhore: transferimi i Antonio Kontes i ka rikthyer entuziazmin një ambienti disi në depresion dhe besimin e merkatove. Hapësira e krijuar nga Juventusi menjëherë është reduktuar, investitorët kinezë kanë garantuar një buxhet dhe shumë lojtarë, nga Lukaku te Barela, kanë miratuar menjëherë t’i bashkohen ish-trajnerit të Italisë. Punimet kanë nisur menjëherë: kontakte telefonike të vazhdueshme edhe në fazën përpara afrimit, të ndjekura nga takimet gjatë seancave të dyfishta dhe puna konstante me një staf të organizuar nga vetë Konte. Linja drejtuese me bazë skemën 3-5-2 ishte e parashikuar, por emergjenca e parë e vërtetë ishte të rikthehej besueshmëria dhe të largoheshin shqetësimet. Ndaj, në kohë shumë të shkurtra, janë larguar Mauro Ikardi, Ivan Perisiç dhe Raxha Naingolan. Gjatë 100 ditëve të para të qeverisjes, Konte ka krijuar një grup kompakt dhe për më shumë të mbrojtur nga thashethemet e jashtme, pa elementë negativë, por i ndërtuar në bazë të soliditetit. Një tjetër nga aksionet e para ka
qenë rilindja e resurseve të brendshme: Ranokia dhe Kandreva. Gjatë momenteve të para zyrtare në “San Siro” dhe Kaljari, është shfaqur fillimisht aftësia për të guxuar (4-0 me Leçen), më pas aftësia për të reaguar përballë një kundërshtari agresiv (2-1
në transfertë).
NË AXHENDË - Sigurisht, për momentin janë hedhur vetëm skicat e një projekti që do të duhet të konfirmohet përpara problemeve dhe situatave më të ndërlikuara, si për shembull në derbi. Mungon, së pari, ballafaqimi me Europën, ku
Interi po aspiron rikthimin mes fuqive që qëndrojnë me vazhdimësi në “G8”. Në këtë front, një punë të madhe do të ketë Romelu Lukaku, të cilit Konte i ka besuar detyrën e ngushtimit të diferencës me të mëdhatë europiane, jo vetëm në nivel imazhi, por edhe rezultatesh.
Më pas duhen gjetur resurse të reja për arritjen e objektivave (thelbësor përdorimi i Sançezit) dhe përmirësimi i kontrollit të lojës: shfaqjet e para të Sensit kanë rezultuar pozitive, tani do të nevojitet më shumë kohezion në mesfushë dhe punë në korsitë anësore
me Azamoahn dhe Lazaron. Në këto kohë vëmendja qëndron edhe te mbrojtja, ku po ndërtohet “muri” Godin-De Vraj-Shkrinjar. Në fund, do të kërkohet afrimi me “lokomotivën” juventine. Një tjetër raport pritet ndoshta pas 100 ditësh të tjera.