Ikardi bëhet gati për PSG-në, Tuhel do ta ketë në Champions
Argjentinasi do të debutojë kundër Realit, Kareka: Nuk është fenomen
Operacion i minutave të fundit për PSG-në, që zyrtarizoi 1 orë përpara përfundimit të merkatos transferimin e Mauro Ikardit. Sulmuesi argjentinas perfeksionoi kalimin nga Milanoja në Paris pikërisht në limitet e seksionit veror. Dhe, sipas mediave franceze, shumë shpejt lojtari i huazuar nga Interi do të jetë në formë optimale për trajnerin Tomas Tuhel: që në 18 shtator, për sfidën kundër Realit të Madridit, ndeshja hapëse e Grupit A të Ligës së Kampioneve. Pavarësisht se sulmuesi ka kryer fazën përgatitore jo gjithmonë me skuadrën e parë zikaltër, nuk do t’i nevojitet shumë kohë për të rifituar ritmin. Por, falë pauzës së kombëtareve do të ketë një javë për t’u stërvitur në palestër. Do të mungojë, megjithatë, për ndeshjen e parë të Ligës 1 kundër Strasburgut, e programuar për datën 14 shtator. Për Tuhelin prania e Mauros në Champions do të jetë shumë e rëndësishme. Një tjetër lajm pozitiv për këtë të fundit është rikthimi në seancat stërvitore i Edinson Kavanit. Nuk është rasti i Kiljë Mbapesë, i cili po riaftësohet me ritme më të ngadalta nga problemi në kofshën e majtë. Megjithatë, mungesa e tij kundër Realit po konfirmohet ditë pas dite. KAREKA - Ndërkohë, në një intervistë për mediat italiane, transferimi i Ikardit në klubin parisien është komentuar nga Antonio Kareka, ish-lojtar mes të tjerash i Napolit. Skuadër, e cila e kërkoi Mauron deri në ditën e fundit të merkatos: “Do të kishte mundur të luante në Napoli. Askush nuk do ta kishte ndaluar. Sa keq..., – ka shpjeguar 58vjeçari.Është lojtar i zoti, por jo fenomen. Mendoj se Lukaku është më i fortë. A mund të shndërrohet Ikardi në Karekën e ri? Nuk e di, por mendoj se nuk është një lojtar i aftë të bëjë diferencën. Futbolli italian? Niveli mbetet i lartë, nevojiten vetëm më shumë trajnerë që të njohin potencialin e talenteve”.