Poltrona dhe dragonj, sekretet e “Allianz Stadium”

“Allianz Stadium” mbush tetë vite. Stadiumi në pronësi të Juventusit, me kapacitet prej 41.507 vendesh, është inauguruar në datën 8 shtator 2011 në një miqësore kundër Nots Kauntit, saktësisht tri ditë përpara debutimit zyrtar në Serinë A kundër Parmës. Nga ajo ditë fatet e klubit bardhezi kanë ndryshuar në mënyrë radikale: tetë tituj kampionë radhazi dhe 164 fitore në 208 ndeshje; vetëm dhjetë humbje, kundër Interit, Sampdorias, Bajernit të Mynihut, Fiorentinës, Udinezes, Lacios, Realit të Madridit, Napolit, Mançester Junajtidit dhe Ajaksit.

- Në brendësi të sallave bardhezi ndodhen dy frone: sipas një rrëfimi të “Corriere della Sera” në vitin 2017, njëri ishte i zënë nga kapiteni Xhanluixhi Bufon dhe tjetri nga Mario Manxukiç, i cili e “trashëgoi” nga Andrea Pirlo, pas transferimit të këtij të fundit në MLS-në amerikane. Një shkrim në korridorin e brendshëm karikon skuadrën: “Këtu duhet luftuar gjithmonë dhe kur duket sikur gjithçka është e humbur, beso akoma. Juventusi nuk dorëzohet kurrë”. Një moto e krijuar nga Omar Sivori. Në qendër të sallës së zhveshjeve ndodhet një tavolinë e bardhë, e përdorur për të mbështetur ushqime dhe objekte të tjera. Një tjetër sallë përdoret për masazhet dhe fizioterapinë. Ka edhe një vaskë me hidromasazh. Secili prej lojtarëve zotëron një dollap, në të cilin ndodhet fanella e ndeshjes një peshqir dhe këpucët. Sipër, përpara sallave të ndryshme, ndodhet ora që tregon orarin e saktë. Në murin e djathtë pas korridorit të dytë, nga ku arrihet menjëherë në fushë, ndodhen të gjithë titujt e fituar nga Juventusi, ndërsa në të majtin format e kupave. Duke dalë nga dhomat, ku skuadra takohet me miqtë dhe grupin e arbitrave, lexohet një tjetër frazë e famshme, e prononcuar nga Xhovani Trapatoni: “Juventusi është si një dragua me shtatë kokë, i pret njërën dhe i del gjithmonë një tjetër”.