Apolonia, distanca me kreun rrit presionin
Fierakët nuk janë efikasë në sulm dhe "firot" në pikë mund të kenë kosto të madhe në fund
Humbje "e keqe" për Apoloninë ajo e pësuar në Pogradec të shtunën, me një penallti të kontestuar nga fierakët në minutën e fundit të kohës së rregullt. Gjithsesi, pavarësisht pretendimeve të drejtuesve dhe lojtarëve të Apolonisë, fakt është humbja 2-1 në stadiumin "Gjorgji Kyçyku", ku bardhejeshilët kanë luajtur mirë dhe mbase meritonin të merrnin një pikë. Ky ka qenë fati i "ruletës" së kësaj jave për skuadrën e trajnerit Artan Mërgjyshi, që tashmë e sheh veten 5 pikë larg Lushnjës së vendit të parë, duke krijuar "simbiozë" me tri skuadra të tjera, Devollin, Pogradecin dhe Orikun, me të cilat ndan vendet 2-5. Ndoshta ishte menduar i lehtë Grupi B para fillimit të kampionatit, por po aq i paparashikueshëm të paktën në këto 6 javë nistore. Shënkolli ka tri ndeshje radhazi që po befason me rezultate dhe jo më pak Iliria javën e fundit. Apolonia duhet të mos mendojë vetëm për ekipet e ashtumenduara si pretendente për Superioren. Asnjë ndeshje nuk është e sigurt, ndaj asnjë kundërshtari, ja pse trajneri Mërgjyshi gjithmonë është i shqetësuar dhe kërkon një ekip që ta "lexojë" qartë kompeticionin ku garon. Apolonia është ende në kohë, por me pikët e lëna në këto 6 javë ia ka vështirësuar jo pak punën vetes. Ndeshjen e radhës e ka në shtëpi me Besën, që renditej ndër pretendentët për Superioren para fillimit të sezonit, por edhe ajo, ashtu si Apolonia, ka lënë shumë pikë. Në Fier do të kërkojë të reagojë me çdo kusht dhe lojtarët e Apolonisë janë të ndërgjegjshëm për këtë fakt. Distanca prej 5 pikësh me Lushnjën e vendit të parë ka filluar të shqetësojë në kampin fierak dhe lënia e të tjera pikëve në vazhdim do ta komplikonte së tepërmi objektivin për elitën.